تۇركىستان وبلىسىنىڭ اكىمى قىتايدىڭ حۋبي پروۆينتسياسىنان كەلگەن دەلەگاتسيامەن كەزدەستى

تۇركىستان وبلىسى. قازاقپارات - تۇركىستان وبلىسىنىڭ اكىمى جانسەيىت تۇيمەبايەۆ قىتاي حالىق رەسپۋبليكاسىنىڭ حۋبي پروۆينتسياسىنان كەلگەن دەلەگاتسيامەن كەزدەستى.

حۋبي پروۆينتسياسىنىڭ حالىق وكىلدەرى جينالىسى جانىنداعى تۇراقتى كوميتەتى ديرەكتورىنىڭ ورىنباسارى ۆان لينگپەن بولعان جۇزدەسۋدە ايماق باسشىسى قازاقستان مەن قىتاي مەملەكەتتەرىنىڭ دوستىق قارىم-قاتىناسى جايىن ءسوز ەتتى، دەپ حابارلايدى قازاقپارات.

تاراپتار سونداي-اق تۇركىستان وبلىسىمەن اراداعى ساۋدا-ەكونوميكالىق بايلانىستاردىڭ جوعارى دەڭگەيدە دامىپ كەلە جاتقانىنا توقتالدى.

«وزدەرىڭىزگە بەلگىلى، 2017-جىل «ق ر- داعى ق ح ر- ءدىڭ تۋريزم جىلى» بولىپ جاريالاندى. وسى شارانىڭ اياسىندا بىلتىر وڭتۇستىك قازاقستان وبلىسىندا «Ontustik Tourism. Invest - 2017: ۇلى قىتاي قورعانىنان ۇلى جىبەك جولىنىڭ جۇرەگىنە دەيىن» حالىقارالىق فورۋمى ءوتتى. ناتيجەسىندە، بەيجىڭدە ۆيزا ورتالىعى اشىلسا، استانادا قىتاي مەملەكەتتىك تۋريزم باسقارماسىنىڭ وكىلدىگى جۇمىسىن باستادى. ءبىز بۇل جۇمىستاردى ودان ءارى جالعاستىرۋعا دايىنبىز. اسىرەسە، قوس تاراپتىڭ تۋريزم سالاسىنداعى جۇمىسى جاندانسا جان-جاقتى قولداۋعا ءازىرمىز»، - دەدى جانسەيىت تۇيمەبايەۆ.

باس قوسۋدا، ءوڭىر باسشىسى اسپان استى ەلىنىڭ وكىلدەرىن وڭدەۋ ونەركاسىبى، مۇناي گاز، مۇناي-حيميا، ماشينا جاساۋ، ەلەكتروتەحنيكا، قۇرىلىس، اۋىل شارۋاشىلىعى ونىمدەرىن وڭدەۋ سىندى سالالاردا بىرلەسە جۇمىس ىستەۋگە شاقىردى. كورشىلەس ەلدەن كەلگەن جۇمىس توبىن باسقارا كەلگەن ۆان لينگ حانىم اتالعان سالالار اياسىندا ىنتىماقتاستىق ورناتۋعا دايىندىعىن ءبىلدىردى.

ايتا كەتەيىك، بۇگىندە قازاقستان مەن قىتاي مەملەكەتتەرىنىڭ ءتۇرلى سالالارداعى بىرلەسكەن 51 جوباسى جۇزەگە اسىرىلىپ جاتسا، ونىڭ بەسەۋى تۇركىستان وبلىسى مەن شىمكەنت قالاسىنىڭ ەنشىسىندە.