دجوشۋا - پوۆەتكين جەكپە-جەگى گولوۆكيننىڭ تابىسىن ازايتادى

استانا. قازاقپارات - Matchroom Boxing پروموۋتەرلىك كومپانياسىنىڭ پرەزيدەنتى ەددي حيرن سۋپەر اۋىر سالماقتاعى ەنتوني دجوشۋا (21-0، 20 ك و) جانە الەكساندر پوۆەتكين (34-1، 24 ك و) كەزدەسۋىنىڭ وتەتىنىن رەسمي مالىمدەدى، دەپ حابارلايدى Sports.kz.

جەكپە-جەك 22- قىركۇيەكتە لوندونداعى «ۋەمبلي» ستاديونىندا وتەدى. وندا قازىر دجوشۋانىڭ يەلەگىندە تۇرعان IBF، WBA Super، WBO جانە IBO تۇجىرىمدارى بويىنشا الەم چەمپيونى بەلدىگى ساراپقا سالىنادى.

دجوشۋا - پوۆەتكين جەكپە-جەگى ەۋروپا نارىعىنا باعىتتالعانمەن، گەننادي گولوۆكين (38-0-1، 34 ك و) جانە ساۋل الۆارەس (49-1-2، 34 ك و) رەماتچىنىڭ تابىسىن ءبىرشاما ازايتۋى مۇمكىن.

ايتا كەتەيىك، گولوۆكين مەن الۆارەس اراسىنداعى العاشقى جەكپە-جەك تە وسى سياقتى قاعاجۋ كورگەن بولاتىن. سول كەزدەسۋ دە لاس-ۆەگاستا، 16- قىركۇيەكتە بولعان. سونىڭ الدىندا عانا، 26- تامىزدا كىشى فلويد مەيۆەزەر (50-0، 27 ك و) مەن UFC چەمپيونى كونور ماكگرەگوردىڭ ۇلكەن شوۋعا اينالعان جەكپە-جەگى وتكەن بولاتىن.