بۋرابايدا قويىلاتىن «ءبىرجان-سارا» وپەراسىنا دايىندىق قالاي جۇرگىزىلۋدە؟
بۇل تۋرالى اقمولا وبلىسى اكىمىنىڭ تۋريزم جونىندەگى كەڭەسشىسى مارات يعاليگە ءوزىنىڭ فەيسبۋكتەگى پاراقشاسىندا ۆيدەوسىن جاريالادى، دەپ حابارلايدى قازاقپارات ءتىلشىسى.
ەسكە سالا كەتەيىك، كەشە كەشكى ساعات 21.30 دا «بۋراباي» ۇلتتىق ساياباعىنداعى ابىلاي حان الاڭىندا ۇلتتىق كلاسسيكا جاۋھارى - مۇقان تولەبايەۆتىڭ «ءبىرجان-سارا» وپەراسى Open Air فورماتىندا قويىلدى. ليريكالىق-درامالىق شىعارما نەگىزىندە اقىن، ءانشى-كومپوزيتور ءبىرجان سال مەن دارىندى ايتىسكەر اقىن سارانىڭ ايتىسى تۋرالى شىنايى وقيعا باياندالادى. وپەرانىڭ باستاپقى يدەياسى شىعارماشىلىق تۇلعالاردىڭ ەركىندىككە دەگەن كۇرەسى، ماحاببات پەن باقىتقا دەگەن ۇمتىلىسى بولىپ تابىلادى.
«ءبىرجان-سارا» وپەراسىنىڭ جاڭا مۋزىكالىق-ساحنالىق رەداكتسياسىنىڭ اۆتورى - قويۋشى رەجيسسەر، PhD دوكتورى، قازاقستاننىڭ ەڭبەك سىڭىرگەن قايراتكەرى اسحات ماەميروۆ، قويۋشى ديريجەرى - قازاقستاننىڭ ەڭبەك سىڭىرگەن قايراتكەرى ابزال مۇحيتدينوۆ، قويۋشى سۋرەتشىلەر - سوفيا تاسماعامبەتوۆا جانە پاۆەل دراگۋنوۆ.
باستى پارتيالاردى ورىندايتىندار: ءبىرجان - حالىقارالىق كونكۋرستاردىڭ لاۋرەاتى مەيىر باينەش، سارا - قازاقستاننىڭ ەڭبەك سىڭىرگەن ءارتىسى، مەملەكەتتىك سىيلىقتىڭ يەگەرى مايرا مۇحامەد قىزى، جانبوتا - قازاقستاننىڭ ەڭبەك سىڭىرگەن قايراتكەرى جانات شىبىقبايەۆ، انالىق - قازاقستاننىڭ ەڭبەك سىڭىرگەن قايراتكەرى دينا حامزينا، التىناي - قازاقستاننىڭ ەڭبەك سىڭىرگەن قايراتكەرى سالتانات احمەتوۆا، جيەنقۇل - تالعات گالەيەۆ، قوجاعۇل - شىڭعىس راسىلحان، سەرىك - رامزات بالاكيشيەۆ، ەستاي - بەيىمبەت تاڭارىقوۆ. سونداي-اق، قويىلىم توبى: باس حورمەيستەر - قازاقستاننىڭ ەڭبەك سىڭىرگەن قايراتكەرى ەرجان ءداۋىتوۆ. قويۋشى بالەتمەيستەر - مۋكارام اۆاحري، تەحنيكالىق ديرەكتورى - «استانا وپەرا» تەاترىنىڭ كوركەمدىك-وندىرىستىك كەشەنىنىڭ جەتەكشىسى ۆيكتور كارارە. جاۋھار تۋىندىنىڭ جاڭا مۋزىكالىق-ساحنالىق رەداكسياداعى تۇساۋكەسەرى وسى جىلدىڭ كوكتەمىندە «استانا وپەرا» ساحناسىندا وتكەن بولاتىن.
جوبا ق ر مادەنيەت جانە سپورت مينيسترلىگىنىڭ قولداۋىمەن ەلوردانىڭ 20 جىلدىق مەرەيتويى اياسىندا جۇزەگە اسىرىلىپ وتىر.