ب ۇ ۇ- عا مۇشە ەلدەر تاريحي شارت ماتىنىنە ۋاعدالاستى
بۇل جايىندا نيۋ-يوركتەگى ۇيىم شتاب-پاتەرىندە ءسوز سويلەگەن ب ۇ ۇ باس اسسامبلەياسىنىڭ ءتوراعاسى ميروسلاۆ لايچاك جاريا ەتتى، دەپ حابارلايدى قازاقپارات «ب ۇ ۇ جاڭالىقتارىنا» سىلتەمە جاساپ.
ميروسلاۆ لايچاكتىڭ ايتۋىنشا، وسى جىلدىڭ جەلتوقسان ايىندا رەسمي تۇردە قابىلداناتىن شارت كوشى-قون اعىنىن قىسقارتۋدى نەمەسە كەڭەيتۋدى قاراستىرمايدى. وندا شىنايى جاعداي كورسەتىلگەن.
«شارتتىڭ الەۋەتى وتە زور. ول ارەكەت ەتۋ رەجىمىنەن بەلسەندى قاتىسۋ رەجىمىنە كوشۋگە مۇمكىندىك بەرەدى. ول كوشى-قون باسىمدىقتارىن پايدالانۋعا مۇمكىندىك بەرىپ، اتالعان پروتسەسس بارىسىندا تۋىندايتىن تاۋەكەلدەردى تومەندەتۋگە مۇمكىندىك بەرەدى. ول ىنتىماقتاستىق ءۇشىن جاڭا تۇعىرناما قۇرادى. ول ادام قۇقىعىن ساقتاۋ مەن مەملەكەت ەگەمەندىگىن قامتاماسىز ەتۋ اراسىنداعى التىن ارالىقتى تابۋعا كومەكتەسەتىن قورعا اينالا الادى»، - دەدى ب ۇ ۇ باس اسسامبلەياسىنىڭ ءتوراعاسى.
سوڭعى دەرەكتەرگە قاراعاندا، اتالعان كەلىسسوزدەر باستالعان ساتتەن جارتى جىل بۇرىن 2098 ميگرانت، ونىڭ ىشىندە 400 بالا قازا تاپقان. بۇل ستاتيستيكالىق دەرەككە ادام ساۋداسىمەن اينالىساتىنداردىڭ تۇتقىنىنا اينالعان قىزدار مەن ايەلدەردىڭ تاعدىرى قوسىلىپ تا وتىرعان جوق.
«ءدال قازىرگى ۋاقىتتا بۇكىل الەمدەگى مىڭداعان بوسقىن دەنساۋلىعى، قاۋىپسىزدىگى جانە ءوز وتباسىنىڭ ءال-اۋقاتى ءۇشىن الاڭداۋلى»، - دەدى لايچاك.
ونىڭ پايىمىنشا، حالىقارالىق قوعامداستىق اتالعان ادامداردىڭ تاعدىرىنا قامقور بولۋى ءتيىس.
ب ۇ ۇ باس حاتشىسى انتونيۋ گۋتەرريش كوشى-قون تۋرالى جاھاندىق شارتتىڭ كەلىسىلگەنىنە قولداۋ ءبىلدىردى.
«2030-جىلعا دەيىنگى كەزەڭگە ارنالعان كۇن ءتارتىپ ۇستانىمدارى مەن نيۋ-يورك دەكلاراتسياسىنىڭ ەرەجەلەرىنە نەگىزدەلگەن بۇل شارت بارلىق مەملەكەتتەردىڭ يگىلىگى ءۇشىن حالىقارالىق كوشى-قوننىڭ بارلىق اسپەكتىلەرىن باسقارۋدى قاراستىراتىن ءبىرىنشى جاھاندىق شارت بولىپ وتىر. وندا ءاربىر ادامنىڭ قاۋىپسىزدىك، لايىقتى ءومىر ءسۇرۋي جانە قورعانىستا بولۋ قۇقىعى مويىندالادى»، - دەلىنگەن ب ۇ ۇ باس حاتشىسىنىڭ مالىمدەمەسىندە.