ۇلىتاۋدا «جەزكيىك» فەستيۆالى ءوتىپ جاتىر
بۇل تۋرالى قازاقپارات وبلىس اكىمىنىڭ سايتىنا سىلتەمە جاساپ حابارلايدى.
بۇگىن فەستيۆالگە قاتىسۋعا كەلگەن مۋزىكالىق ۇجىمدار مەن ۇيىمداستىرۋشىلاردىڭ قاتىسۋىمەن باسپا ءسوز ءماسليحاتى ءوتتى.
«وسى سەكىلدى فەستيۆال سىزدەردە ءبىرىنشى رەت وتكىزىلىپ جاتقانىنا قاراماستان، ول وتە جوعارى دەڭگەيدە ۇيىمداستىرىلعان. جانەدە ول بارلىعىمىزدى قۋانتادى. وسىعان دەيىن مەن ورتالىق ازيادا ءۇش رەت وسى سەكىلدى فەستيۆالدەر ۇيىمداستىرعان بولاتىنمىن. ولاردىڭ بارلىعىندا قازاقستاندىق توپتار ەڭ ۇزدىكتەر قاتارىندا بولدى. سوندىقتان مەن وسى شاراعا باسقا ەلدىڭ ۇجىمدارىن وۋانا الىپ كەلىپ، ولاردىڭ ونەرىن ورتاعا سالماقشىمىز، - دەدى فەستيۆال قاتىسۋشىلارىنىڭ مەنەدجەرى نارينە گريگوريان.
ۇيىمداستىرۋشىلاردىڭ ايتۋىنشا، بارلىق مۋزىكانتتار شارانىڭ وبلىس ورتالىعىنا شالعاي جەردە وتەتىنىنە قاراماستان، «جەزكيىك» فەستيۆالىنە قاتىسۋعا زور قىزىعۋشىلىق تانىتقان ەكەن.
بارلىق ۇجىمدار ءۇشىن الدىن الا فەستيۆال باعدارلاماسى قۇرىلىپ، تاراتىلعان. سونىمەن قاتار شارانىڭ وتەتىن جەرى تۋرالى دا اقپارات جىبەرىلگەن.
بارلىعى فەستيۆالگە 11 مۋزىكالىق ۇجىمدار، 92 قاتىسۋشى كەلگەن. ولاردىڭ ونەرىن تاماشالاۋعا 6 مىڭعا جۋىق كورەرمەن جينالادى دەپ جوسپارلانۋدا. ولاردىڭ قاتارىندا قاراعاندى، جەزقازعان، ساتپايەۆ جانە ۇلىتاۋدىڭ تۇرعىندارىمەن قاتار الماتى جانە استانا قالالارىنان ارنايى قوناقتار كەلمەك.
فەستيۆال شىعارماشىل ۇجىمداردىڭ كاسىبي دەڭگەيىن كوتەرۋ جانە تاجىريبە الماسۋ، فولكلورلىق جانە كلاسسيكالىق مۋزىكانىڭ جاڭا ورىنداۋشىلارىنا قولداۋ كورسەتۋ، حالىق مادەنيەتىن ساقتاۋ جانە دامىتۋ، دارىندى شەبەرلەردى انىقتاۋ، جاقىن جانە الىس شەتەلدەرمەن مادەني بايلانىستاردى دامىتۋ جانە نىعايتۋ ماقساتىندا ۇيىمداستىرىلعان.