وزبەكستان اتوم ەلەكتر ستانساسىن سالماق

استانا. قازاقپارات - وزبەكستان اتوم ەلەكتر ستانساسىن قۇرۋدى جوسپارلاپ وتىر، دەپ حابارلايدى قازاقپارات ءتىلشىسى وزبەكستاننىڭ ۇلتتىق اقپارات اگەنتتىگىنە سىلتەمە جاساپ.

«ءبىزدىڭ ەلدە اتومدى بەيبىت ماقساتتا پايدالانۋ ءۇشىن اتوم ەنەرگەتيكاسىن قۇرۋ ءىسى قولعا الىندى. رەسەيلىك «روساتوم» مەملەكەتتىك كورپوراتسياسىمەن بىرلەسىپ اتوم ەلەكتر ستانساسىن اشۋ تۋرالى كەلىسىم جاساستىق. اتالمىش كەشەن ءارقايسىسىنىڭ قۋاتى 1200 مەگاۆاتتى قۇرايتىن ەكى ەنەرگەتيكالىق بلوكتان تۇراتىن بولادى» دەلىنگەن پرەزيدەنت شاۆكات ميرزيەيەۆتىڭ توراعالىعىمەن وتكەن اتوم ەنەرگەتيكاسىن قۇرۋ بويىنشا ۇيىمداستىرۋ-تەحنيكالىق شارالاردى ورىنداۋ ماسەلەلەرىنە ارنالعان كەڭەس ناتيجەسى بويىنشا جاسالعان حابارلامادا.

وزبەكستاننىڭ ۇلتتىق اقپارات اگەنتتىگىنىڭ مالىمەتىنشە، اتوم ەلەكتر ستانساسى مەملەكەتكە جىل سايىن تابيعي گازدىڭ 3,7 ميلليارد تەكشە مەترىن ۇنەمدەۋگە مۇمكىندىك بەرەدى.

گازدى وندەۋ ناتيجەسىندە مۇناي-حيميا ونىمدەرى جاسالادى. ولاردىڭ باعاسى ۇستىنەن ءبىرشاما ەسەلەنەدى. ال ۇنەمدەلگەن گاز وڭدەۋسىز ەكسپورتقا جىبەرىلەتىن بولسا، وزبەكستاننىڭ قورجىنىنا جىلىنا 550-600 ميلليون دوللار پايدا ءتۇسىپ تۇرادى.