قوستانايلىق كلۋب ەۋروكۋبوك ويىندارىنا بىرنەشە جىلدان كەيىن قايتا ورالىپ وتىر. نەگىزىندە بۇل سىنعا شىمكەنتتىڭ «ورداباسى» كلۋبى قاتىسۋى ءتيىس بولاتىن. قازاقستان فۋتبول فەدەراتسياسى ءبىرقاتار تالاپتاردى ورىنداي الماعان ولاردى بۇل جارىستان شەتتەتىپ، ورنىنا «توبىلدى» قوستى.
بۇگىنگى ويىن گرۋزيا استاناسى - تبيليسي قالاسىنداعى بەلگىلى فۋتبولشى ميحايل مەسحي قۇرمەتىنە ارنالعان «لوكوموتيۆ» ستاديونىندا ءوتتى. جاسىل الاڭعا «سامترەديا» ساپىنان پوگورەلىي، گۋرۋلي، ماماساحليسي، گي، ماكاتساريا، باچياشۆيلي، پانتسۋلايا، چاچۋا، فاتيچ، گوگياشۆيلي، ەندەلادزە شىقسا، «توبىل» قۇرامىندا نەپوگودوۆ، كاسساي، ميروشنيچەنكو، دميترەنكو، كۆەكۆەسكيري، نۇرعاليەۆ، تۇرىسبەك، كانكاۆا، جۋلپا، نوسەربايەۆ، فەدين بولدى.
ويىنعا سولتۇستىك يرلانديادان كەلگەن تورەشى تيم مارشالل قازىلىق ەتتى. كەزدەسۋ استانا ۋاقىتىمەن 22.00 دە باستالدى.
ماتچتىڭ ءبىرىنشى كەزەڭىندە دوپ نەگىزىنەن الاڭ ورتاسىندا ءجۇردى دەسەك تە بولادى. كەزدەسۋدىڭ 10-مينۋتىنا دەيىن قوس قاقپاعا دوپ باعىتتالعان جوق. كەلەسى 45-مينۋتتا «توبىلدىڭ» باسىمدىعى بايقالىپ تۇردى. دەسە دە قازاقستاندىق فۋتبولشىلار ول مۇمكىندىكتەردى گولعا اينالدىرا العان جوق. ويىننىڭ اياقتالۋىنا ساناۋلى سەكۋندتار قالعاندا «توبىل» ساپىنان ماكسيم فەدين الىستان شىرەنە دوپ تەۋىپ، ول قاقپا تورىندا تۋلاپ جاتتى. وسىلايشا قوستانايلىقتار جەڭىسكە جەتتى. ەسەپ - 1:0.
ەستەرىڭىزگە سالا كەتەلىك، ەۋروپا ليگاسىندا «توبىلدان» وزگە الماتىنىڭ «قايراتى» مەن پاۆلوداردىڭ «ەرتىسى» سىنعا تۇسەدى. اتاپ ايتقاندا، 12- شىلدەدە سىرت الاڭدا «قايرات» اندوررانىڭ «ەنگوردان»، «ەرتىس» ليتۆانىڭ «تراكاي» كلۋبىمەن شەبەرلىك بايقاسادى. قازاقستاندىق ءۇش كلۋبتىڭ دا قارىمتا ويىندارى 19- شىلدەدە ءوز الاڭىندا بولادى. ال چەمپيوندار ليگاسىندا 11- شىلدەدە ەلوردالىق «استانا» ءوز الاڭىندا چەرنوگوريانىڭ «سۋتەسكا» كلۋبىن قابىلدايدى.