قوپا كولىندە جازعى دەمالىس ايماعى اشىلدى

  استانا. قازاقپارات - بيىل كوكشەتاۋلىقتاردىڭ جانە قالا مەيماندارىنىڭ جازعى دەمالىسىن ۇيىمداستىرۋ شارالارى بەلسەندى تۇردە جۇرگىزىلۋدە.

ايدىن كولدىڭ جاعالاۋىنا قونىستانعان قالا بولعاندىقتان، كەلۋشىلەرگە تۋريستىك جانە سەرۆيستىك قىزمەت كورسەتۋ ماقساتىندا جازعى دەمالىس ايماعى اشىلدى.

بيىلعى جىلدىڭ 6 ايى ىشىندە قالاعا 10 مىڭنان اسا تۋريست ات باسىن تىرەگەن.

شىلدەنىڭ ىستىعىندا شومىلۋ ماۋسىمى كۇنىنە 2 مىڭداي كوكشەتاۋلىقتى جيناۋدا. وسىدان ءتورت جىل بۇرىن كولگە جاقىن ورنالاسقان جەكەمەنشىك تۇرعىن ۇيلەر الىنىپ، ونىڭ ورنىنا وسى زامانعى وسكەلەڭ تالاپتارعا ساي دەمالىس جانە ساۋدا ورىندارى، تۇتاس تۇرعىن ءۇي كەشەندەرى بوي كوتەرۋدە. نەگىزگى جاعاجاي گوركيي كوشەسى بويىنداعى تەننيس ورتالىعى مەن «جانسايا» جاڭا تۇرعىن ءۇي كەشەنى ماڭىندا جاسالدى.

«كۋيبىشيەۆ جانە گوركي كوشەلەرى تۇسىنان قوپا كولىنىڭ جاعالاۋىندا جاعاجاي ايماعى اباتتاندىرىلدى، ماڭايى قورشالىپ، قۇمى رەتكە كەلتىرىلدى، كيىنىپ- شەشىنۋ كابينالارى، ورىندىقتار، بيوتۋالەتتەر ورناتىلدى، جازعى ءدامحانا سالىندى. جالپى، جوبا قۇنى 7 ميلليون تەڭگەنى قۇراپ وتىر. قازىرگى ۋاقىتتا قىسقى ءدامحانا قۇرىلىسى جۇرۋدە» ، - دەيدى اقمولا وبلىستىق تۋريزم باسقارماسىنىڭ باسشىسى دانيار يدياتوۆ.

كولدىڭ ەكولوگياسىنا كەرى اسەر تيگىزبەۋ ماقساتىندا جاعاجايدا تازالىق بەيسەنبىلىكتەرى ۇيىمداستىرىلۋدا.

«جازعى دەمالىستىڭ قازىرگىدەي قىزعان شاعىندا قالامىزدىڭ تازالىعىن ساقتاۋعا ءبىز دە ءوز ۇلەسىمىزدى قوسقىمىز كەلەدى. سول سەبەپتى تازالىق بەيسەنبىلىگىنە ءوز ۇجىمىمىز بولىپ ءبىر كىسىدەي قاتىستىق. مۇنداي شارانى الداعى ۋاقىتتا داستۇرگە اينالدىرۋ كەرەك. ويتكەنى، قالامىزدىڭ تازالىعى ەشكىمدى بەيجاي قالدىرماۋعا ءتيىس» ، - دەيدى كوكشەتاۋ قالاسى قارجى ءبولىمىنىڭ بيۋدجەتتىك سەكتور مەڭگەرۋشىسى گۇلنار قۇستايەۆا.

بۇعان دەيىن قوپا كولىنىڭ جاعالاۋىندا ينفراقۇرىلىمى تولىق ساقتالعان جاعاجاي بولعان ەمەس. دەمالىسقا لايىقتى كوممۋنالدىق جانە سەرۆيستىك قىزمەت كورسەتىلمەگەندىكتەن اركىم ءوز بەتىنشە سۋعا شومىلۋدى ادەتكە اينالدىردى. ەندى رەسمي تۇردە اشىلعان جاعاجايدىڭ سۋدان قۇتقارۋشىلارى، ءتارتىپتى قاداعالاۋشىلارى بار.

«ءبىز جاعاجايعا كەلۋشىلەرگە قازاق جانە ورىس تىلدەرىندە دايىندالعان جادىنامالاردى تاراتامىز. تيىم سالىنعان ەرەجەلەردى تۇسىندىرەمىز، كەڭەس بەرەمىز. قاراپايىم دا قاجەتتى ەسكەرتپەلەر بار. ودان ارىعا ءجۇزۋدىڭ ءقاۋىپتى ەكەنىن ەسكەرتەتىن بەلگىلەر ورناتىلعان، بيىك باقىلاۋ مۇنارىنان قۇتقارۋشىلار قاراپ تۇرادى، قايىق، باسقا قۇرال- جابدىقتىڭ ءبارى دايىن» ، - دەيدى شۇعىل قۇتقارۋشىلار وتريادى جەتەكشىسىنىڭ ورىنباسارى تالعات ايتپايەۆ.

جاعاجايعا كەلىپ دەمالۋشىلار كاتاماران جانە سۋ سكۋتەرلەرىنىڭ قىزمەتىن، باتۋتتى پايدالانا الادى. كۇنگە قىزدىرىنىپ كەتپەۋ ءۇشىن جاعاجاي بويىنشا زونتتار ورناتىلدى جانە شەشىنەتىن ورىندار جاسالدى.

«سۋ قاشاندا ادامعا كوتەرىڭكى كوڭىل سىيلايدى، سەرگىتەدى. سۋعا تۇسسەڭ، شارشاعانىڭ باسىلىپ، جانىڭ جادىرايدى. جاز شىعا جۇرتتىڭ سۋ ىزدەپ، كولىككە وتىرىپ، وزەن- كولدى جاعالاپ كەتەرى سوندىقتان. ال، قالا ىرگەسىندە قوپاداي شالقىعان شالقار كولدىڭ بولۋى ۇلكەن قۋانىش، تاپتىرماس ولجا. مىنە، قالانىڭ كۋيبىشيەۆ كوشەسىنىڭ كولگە تىرەلەتىن تۇسىنان ارنايى جاعاجايدىڭ اشىلۋى قالا حالقىنا جاڭا ءبىر تىنىس بولدى» ، - دەيدى قالا تۇرعىنى ەرمەك تالاسبايەۆ.

Baq.kz