قازاقستاندا بۇكىل الەمدىك بوكس قاۋىمداستىعىنىڭ شتاب- پاتەرى اشىلادى
استانادا وتكەن WBA پرەزيدەنتى جيلبەرتو مەندوزا مەن ۇيىم وكىلدەرى جانە بەيبىت شۇمەنوۆ قاتىسقان باسپا ءسوز ءماسليحاتىندا قازاقستاندا كاسىبي بوكستى دامىتۋ ماسەلەلەرى قوزعالدى.
جيلبەرتو مەندوزا قازاقستاندا بوكستىڭ العا قويىلعانىن جانە قازاقستاندىق بوكسشىلاردىڭ الەمدىك تۇرعىدا جوعارى ناتيجە كورسەتكىشى بارىن ايتا كەلە كاسىبي بوكستى ودان ءارى دامىتۋ ماقساتىندا قازاقستاندا بۇكىل الەمدىك بوكس اسسوتسياتسياسىنىڭ شتاب- پاتەرى اشىلاتىنىن ءسوز ەتتى.
«استانادا وتكەن ديرەكتورلار كەڭەسىنىڭ وتىرىسى ناتيجەسىندە WBA- نىڭ قازاقستاندا ايماقتىق شتاب پاتەرىن اشۋدى شەشتىك. بۇل تۋرالى استانا قالاسىنىڭ اكىمى ءا. يسەكەشەۆ مىرزامەن دە كەزدەسىپ، ەكىجاقتى تالقىلادىق. قازاقستاننىڭ بوكستان الەۋەتى جوعارى، بۇدان بولەك الەمدىك دەڭگەيگە شىقپاي جۇرگەن قانشاما تالانتتار بار. شتاب پاتەر ماسەلەسىنە كەلسەك قازىر كەلىسىمدەر جاسالۋ ۇستىندە، بارلىعى ويداعىداي بولسا ۇستىمىزدەگى جىلدىڭ اياعى نەمەسە 2019 -جىلدىڭ باسىندا اشامىز»، - دەدى WBA پرەزيدەنتى.
ودان بولەك شتاب-پاتەرگە ايماقتىق تيتۋل بەرىلەدى. ياعني، قازاقستانداعى شتاب-پاتەر بىرنەشە مەملەكەتتىڭ بوكسشىلارىنىڭ باسىن قۇرايتىن ورتالىق بولادى.
«قازاقستاندا الەمدىك ۇيىمنىڭ وكىلدىگىن اشۋ ماسەلەسىن ءبىراز كەلىسىپ، تالقىلادىق. WBA- نىڭ شتاب پاتەرى اشىلسا ءبىز ءۇشىن تاريحي وقيعا، سەبەبى بۇكىل الەمدىك بوكستىڭ ورتاسىندا بولامىز. بۇل ۇيىمنىڭ اتىنان مۇحاممەد ءالي، مايك تايسون، روي دجونس، فلويد مەيۆەزەر سەكىلدى بوكس اڭىزدارى شىققان. ال ءبىز ءۇشىن ەڭ باستىسى ەلىمىزدەن جاڭا تالانتتاردىڭ شىعۋىنا سەپتىگىن تيگىزەدى»، - دەدى بەيبىت شۇمەنوۆ.
سونىمەن قاتار ۇيىمداستىرۋشىلار ايماقتىق شتاب-پاتەر قۇرامىندا قازاقستاننان باسقا قانداي مەملەكەتتەر بولاتىنى انىقتالۋ ۇستىندە ەكەنىن ەسكەرتتى.
ودان بولەك، بۇكىلالەمدىك بوكس اسسوتسياتسياسىنىڭ شتاب پاتەرى اشىلعاندا الەمدىك دەڭگەيدەگى بوكس باسەكەلەرىنىڭ قازاقستاندادا وتەتىندىگىن جانە سول شارالاردى HBO، NBC، Showtime تەلەكومپانيالارىنىڭ قازاقستانعا كەلىپ ترانسلياتسيا جاسايتىنىن ايتتى.