استانادا ازيا- تىنىق مۇحيت ەلدەرىنىڭ «ەۋروۆيدەنيەسى» وتەدى
«ازيا- تىنىق مۇحيت حابار تاراتۋ وداعىنا مۇشە 10 مەملەكەتتىڭ ارتىستەرى قاتىسادى. ناقتىراق ايتقاندا، ءان سايىسىندا تۇركيا، نەپال، مالديۆ، قازاقستان، ءۇندىستان، قىتاي، اۋعانستان، يندونەزيا، ۆەتنام، تۇرىكمەنستان ەلدەرىنىڭ انشىلەرى ءوزارا باق سىناسادى. فەستيۆالدە قازاقستاننىڭ نامىسىن جاس ورىنداۋشىلار رۇستەم جۇگىنىسوۆ پەن دجوردان اراكەليان قورعايدى» ، - دەدى «قازمەديا ورتالىعىنىڭ» باس ديرەكتورى ءلاززات ءجۇنىسوۆا.
قازاقستان بيىل اتالعان فەستيۆالدى وتكىزەتىن ورتالىق ازياداعى ءبىرىنشى ەل بولىپ وتىر. ايتۋلى شارا 11 - شىلدە كۇنى ساعات 19:00 دە «قازمەديا ورتالىعىنىڭ» كينوكونتسەرت زالىندا باستالادى. كىرۋ تەگىن.
ءلاززات ءجۇنىسوۆانىڭ ايتۋىنشا، فەستيۆال راديوفورمات تۇرىندە «قازاق راديوسى» ارقىلى تاراتىلادى. ال سايىستىڭ تەليەۆيزيالىق نۇسقاسىن «Kazakh TV» ارناسىنان كورۋگە بولادى. سونىمەن قاتار، فەستيۆالدىڭ تىكەلەي ەفيردەگى تاراتىلىمى تۇرىكمەنستان، اۋعانستان، نەپال، يندونەزيا مەن مالديۆ ارالدارىندا جۇرگىزىلەدى.
ەسكە سالا كەتسەك، اتالمىش بايقاۋ ەلوردانىڭ 20 جىلدىق مەرەيتويى قۇرمەتىنە 10-12 - شىلدە ارالىعىندا استانادا وتەتىن «ازيا مەديا ديالوگى» جوباسى اياسىندا ۇيىمداستىرىلىپ وتىر. «ازيا مەديا ديالوگى» اياسىندا سەمينارلار، كونفەرەنتسيالار وتكىزىلەدى.