شەت مەملەكەتتەر باسشىلارى ەلباسىن تۋعان كۇنىمەن قۇتتىقتادى
رەسەي فەدەراتسياسىنىڭ پرەزيدەنتى ۆلاديمير پۋتين ءوزىنىڭ قۇتتىقتاۋ جەدەلحاتىندا استانا مەن ماسكەۋ اراسىنداعى وداقتاستىق پەن ستراتەگيالىق سەرىكتەستىكتىڭ ودان ءارى نىعايىپ، قازاقستان مەن رەسەيدىڭ ەۋرازيالىق ەكونوميكالىق وداق، ۇجىمدىق قاۋىپسىزدىك شارت ۇيىمى، شانحاي ىنتىماقتاستىق ۇيىمى، تاۋەلسىز مەملەكەتتەر دوستاستىعى جانە باسقا دا حالىقارالىق قۇرىلىمدار اياسىنداعى ءوزارا تابىستى ىقپالداستىعى كەڭەيە تۇسەتىنىنە سەنىم ءبىلدىردى.
«ءسىز ءوز ەڭبەگىڭىزدىڭ ارقاسىندا قازاقستان حالقىنىڭ قۇرمەتىنە بولەنىپ، حالىقارالىق دەڭگەيدە جوعارى بەدەلگە يە بولدىڭىز. ءسىزدىڭ ەۋرازيالىق ينتەگراتسيا جونىندەگى يدەيالارىڭىز ەلدەرىمىزدىڭ الەۋمەتتىك- ەكونوميكالىق دامۋىنا، ەۋرازيا قۇرلىعىنداعى تۇراقتىلىق پەن قاۋىپسىزدىكتى قامتاماسىز ەتۋگە سەپتىگىن تيگىزىپ، دايەكتى تۇردە جۇزەگە اسىرىلىپ كەلەدى.
شىن جۇرەكتەن سىزگە زور دەنساۋلىق، باق- بەرەكە، اماندىق جانە جاڭا جەتىستىكتەر تىلەيمىن»، - دەلىنگەن جەدەلحاتتا.
***
بەلارۋس رەسپۋبليكاسىنىڭ پرەزيدەنتى الەكساندر لۋكاشەنكو نۇرسۇلتان نازاربايەۆتىڭ ەكى ەل اراسىنداعى قارىم- قاتىناستاردى ستراتەگيالىق تۇرعىدا نىعايتۋعا قوسقان جەكە ۇلەسىن بەلارۋس حالقى جوعارى باعالايتىنىن اتاپ ءوتتى.
«ءسىزدىڭ جاسامپاز جانە جان- جاقتى قىزمەتىڭىز قازاقستاندى قۋاتتى ءارى تاۋەلسىز ەلگە اينالدىردى، ال سىندارلى ءارى كورەگەن سىرتقى ساياساتىڭىز حالىقارالىق ارەنادا كەڭ قولداۋعا يە بولدى.
ەكى جاقتى ارىپتەستىكتى نىعايتۋ ءبىزدىڭ دوستاس حالىقتارىمىزدىڭ مۇددەسىنە جانە ورتاق ەۋرازيالىق ءۇيىمىزدى دامىتۋعا ودان ءارى قىزمەت ەتە بەرەدى دەپ سەنەمىن»، - دەلىنگەن جەدەلحاتتا.
***
تۇرىكمەنستان پرەزيدەنتى گۋربانگۋلى بەردىمۇحامەدوۆ ءوز حاتىندا مەملەكەت باسشىسىنىڭ قازاقستان حالقىنىڭ يگىلىگى جولىنداعى بارلىق باستامالارىنىڭ تابىستى جۇزەگە اسىرىلۋىنا تىلەكتەستىك ءبىلدىردى.
«ءسىزدىڭ دانا باسشىلىعىڭىزدىڭ ارقاسىندا باۋىرلاس قازاقستان رەسپۋبليكاسى الەۋمەتتىك- ەكونوميكالىق دامۋ جولىندا زور جەتىستىكتەرگە جەتىپ، حالىقارالىق ارەناداعى بەدەلىن دايەكتى تۇردە نىعايتىپ كەلەدى.
ەكى جاقتى قاتىناستارىمىزدىڭ جوعارى دەڭگەيى تۇرىكمەنستان- قازاقستان اراسىنداعى ستراتەگيالىق سەرىكتەستىكتى جانە مەملەكەتارالىق بايلانىستاردى بارلىق باعىتتار بويىنشا ودان ءارى كەڭەيتۋ ءۇشىن بەرىك نەگىز بولاتىنىنا سەنىمدىمىن»، - دەلىنگەن جەدەلحاتتا.
***
ارمەنيا رەسپۋبليكاسىنىڭ پرەزيدەنتى ارمەن ساركيسيان ءوز جەدەلحاتىندا ەكى ەل اراسىندا قالىپتاسقان سىندارلى ءوزارا ءىس- قيمىل ارمەنيا- قازاقستان مەملەكەتارالىق ىنتىماقتاستىعىنىڭ كۇن ءتارتىبىن ەلەۋلى تۇردە تولىقتىرا تۇسەتىنىن اتاپ ءوتتى.
«ءسىز مەملەكەتتى باسقارۋ ىسىندەگى مول تاجىريبەڭىزدىڭ، قازاقستان رەسپۋبليكاسىنىڭ مۇددەسىن تاباندىلىقپەن قورعاي بىلەتىندىگىڭىزدىڭ جانە كەڭ كولەمدى حالىقارالىق ىنتىماقتاستىقتى ىلگەرىلەتۋ مىندەتتەرىن شەشە الاتىندىعىڭىزدىڭ ارقاسىندا حالىقارالىق ارەنادا زور قۇرمەت پەن بارشا جۇرت مويىنداعان بەدەلگە يە بولدىڭىز.
سىزگە زور دەنساۋلىق، اماندىق پەن تولايىم تابىس، ال قازاقستان حالقىنا بەيبىت ءومىر مەن باق- بەرەكە تىلەيمىن»، - دەلىنگەن جەدەلحاتتا.
***
مولدوۆا رەسپۋبليكاسىنىڭ پرەزيدەنتى يگور دودون نۇرسۇلتان نازاربايەۆتى تۋعان كۇنىمەن قۇتتىقتاپ، ەۋرازيالىق ەكونوميكالىق وداقتى قۇرۋعا جانە قالىپتاستىرۋعا زور ۇلەس قوسقانىن اتاپ ءوتتى.
«ءسىز وتكەن عاسىردىڭ 90- جىلدارىنىڭ وزىندە ەلدەرىمىز ءۇشىن قازىرگى كۇردەلى الەمدە ەگەمەندىك پەن تاۋەلسىزدىكتى ساقتاۋمەن قاتار ءوز ەكونوميكالىق الەۋەتىن ارتتىرۋدىڭ ماڭىزدى ەكەنىن دە ءتۇسىنىپ، وسى ماقساتپەن ەرىكتىلىك پەن تەڭ قۇقىلى ۇستانىمعا نەگىزدەلگەن مەملەكەتارالىق بىرلەستىك قۇرۋدى ۇسىندىڭىز. ءسىزدىڭ يدەياڭىز جۇزەگە اسىپ، ەۋرازيالىق ەكونوميكالىق وداق قۇرىلدى. وسى ۇيىمدا مولدوۆا رەسپۋبليكاسى باقىلاۋشى مەملەكەت مارتەبەسىن الدى»، - دەلىنگەن جەدەلحاتتا.
***
يسپانيا كورولى VI فەليپە استانانىڭ 20 جىلدىق مەرەيتويىنا جانە مەملەكەت باسشىسىنىڭ تۋعان كۇنىنە وراي قۇتتىقتاۋ جەدەلحاتىن جولدادى.
«استانا «ەكسپو-2017» حالىقارالىق كورمەسىنىڭ اشىلۋ راسىمىنە قاتىسۋ ءۇشىن ءسىزدىڭ ەلىڭىزگە ساپارمەن بارعاندا قوناقجايلىق تانىتىپ، مەنى ىستىق ىقىلاسپەن قارسى العانىڭىز ەسىمدە.
وسى تاماشا مۇمكىندىكتىڭ ارقاسىندا مەن ەلورداڭىزدىڭ زاماناۋي ينفراقۇرىلىمى بار ءارى جارقىن بولاشاققا ۇمتىلعان ءىرى قالاعا اينالعانىن كوردىم» ، - دەلىنگەن جەدەلحاتتا.
***
پولشا رەسپۋبليكاسىنىڭ پرەزيدەنتى اندجەي دۋدا قازاقستان مەن پولشا اراسىنداعى دوستىق قاتىناستار ەكى جاقتى تابىستى ىنتىماقتاستىقتىڭ دالەلى ەكەنىن اتاپ ءوتتى.
«قازاقستان پولشانىڭ ورتالىق ازيا وڭىرىندەگى ماڭىزدى ارىپتەستەرىنىڭ ءبىرى سانالادى.
جاھاندىق پروبلەمالاردى شەشۋ ىسىنە بەلسەندى اتسالىسقانىڭىز ءۇشىن سىزگە زور قۇرمەتپەن قارايمىن. قازاقستاننىڭ بىرىككەن ۇلتتار ۇيىمىنىڭ قاۋىپسىزدىك كەڭەسىنە ءتوراعالىق ەتۋ كەزىندەگى باستامالارى، سونىڭ ىشىندە ءوزىم قاتىسقان جوعارى دەڭگەيدەگى جارىسسوزدەر - سونىڭ ايقىن دالەلى. ءسىز قولعا الىپ جاتقان يگى ىستەر وڭىردە جانە الەمدە بەيبىتشىلىك پەن قاۋىپسىزدىكتى نىعايتۋعا سەپتىگىن تيگىزەدى دەن سەنەمىن»، - دەلىنگەن جەدەلحاتتا.
***
سەربيا رەسپۋبليكاسىنىڭ پرەزيدەنتى الەكساندر ۆۋچيچ بارشا قازاقستاندىقتاردى استانانىڭ 20 جىلدىعىمەن قۇتتىقتاپ، مەملەكەت باسشىسىنا جاۋاپتى قىزمەتتە تابىسقا جەتە بەرۋىنە تىلەكتەستىك ءبىلدىردى.
«قازاقستاننىڭ قول جەتكىزگەن جەتىستىكتەرىنە ءتانتى ەكەنىمدى بىلدىرگىم كەلەدى. ءسىز ءتيىمدى باسشىلىعىڭىزدىڭ ارقاسىندا ء«تورتىنشى ونەركاسىپتىك ريەۆوليۋتسيا جاعدايىنداعى دامۋدىڭ جاڭا مۇمكىندىكتەرى»، «بەس الەۋمەتتىك باستاما»، «قازاقستان - 2050» ستراتەگياسى» سياقتى باستامالار اياسىندا كوزدەگەن ماقساتتارىڭىزدىڭ بارىنە قول جەتكىزەسىز دەپ سەنەمىن.
ءسىزدىڭ كورەگەندىگىڭىز بەن جۇمىسقا بەرىلگەندىگىڭىزدىڭ ارقاسىندا قازاقستان قارىشتاپ دامىپ، بىرتە- بىرتە الەمدە ماڭىزدى ورىنعا يە بولىپ كەلە جاتىر» ، - دەلىنگەن جەدەلحاتتا.
***
بولگاريا رەسپۋبليكاسىنىڭ پرەزيدەنتى رۋمەن راديەۆ ەكى جاقتى نەگىزدەگى جانە ەۋروپا وداعى مەن قازاقستان قارىم- قاتىناستارى اياسىنداعى مەملەكەتارالىق ديالوگتىڭ دامۋ بارىسىنا كوڭىلى تولاتىنىن ايتتى.
«ەلدەرىمىز بەن حالىقتارىمىزدىڭ اراسىنداعى دوستىق قارىم- قاتىناستار ءبىزدىڭ ساياسي، ەكونوميكالىق جانە مادەني سالالارداعى ىنتىماقتاستىعىمىزدىڭ نىعايۋىنا ءوز ۇلەسىن قوساتىنىنا سەنىمدىمىن»، - دەلىنگەن جەدەلحاتتا.
***
گرۋزيا پرەزيدەنتى گيورگي مارگۆەلاشۆيلي قازاقستان تاۋەلسىزدىك العان ساتتەن بەرگى، سالىستىرمالى تۇردە، از ۋاقىت ىشىندە نۇرسۇلتان نازاربايەۆتىڭ باسشىلىعىنىڭ ارقاسىندا قۋاتتى، دامىعان، جوعارى حالىقارالىق بەدەل مەن سەنىمگە يە بولعان مەملەكەتكە اينالعانىن اتاپ ءوتتى.
«بۇل كۇندەرى 20 جىلدىعىن اتاپ ءوتىپ جاتقان استانا زاماناۋي قازاقستان دامۋىنىڭ سيمۆولى ەكەنى ءسوزسىز.
ءسىزدىڭ گرۋزيا مەن قازاقستان اراسىنداعى ىنتىماقتاستىقتى دامىتۋعا جانە نىعايتۋعا ولشەۋسىز ۇلەس قوسقانىڭىزدى ەرەكشە اتاپ وتكىم كەلەدى. ەكى ەل اراسىنداعى دوستىق پەن ءوزارا ءتيىمدى قارىم- قاتىناستار ءداستۇرى الداعى ۋاقىتتا دا نىعايا بەرەدى دەپ سەنەمىن»، - دەلىنگەن جەدەلحاتتا.
***
رەسەي فەدەراتسياسى ۇكىمەتىنىڭ ءتوراعاسى دميتري مەدۆەديەۆ ءوزىنىڭ قۇتتىقتاۋ جەدەلحاتىندا قازاقستان پرەزيدەنتىنىڭ ەكى مەملەكەتتى بايلانىستىراتىن دوستىق قارىم- قاتىناستاردى، تاتۋ كورشىلىكتى جانە وداقتاستىقتى نىعايتۋعا قوسقان جەكە ۇلەسىن ەرەكشە اتاپ ءوتتى.
«ساۋدا- ەكونوميكالىق جانە ينۆەستيتسيالىق ىنتىماقتاستىق دايەكتى تۇردە دامىپ كەلەدى جانە ەنەرگەتيكا، ونەركاسىپ، ينفراقۇرىلىم، جوعارى تەحنولوگيالار مەن باسقا دا سالالارداعى پەرسپەكتيۆتى بىرلەسكەن جوبالار جۇزەگە اسىرىلۋدا.
ۇكىمەتتەرىمىز اراسىنداعى بەلسەندى ارىپتەستىككە نەگىزدەلگەن جۇمىستار تاجىريبە جۇزىندەگى كووپەراتسيانى ودان ءارى ارتتىرۋعا جانە ەۋرازيالىق ەكونوميكالىق وداق اياسىنداعى ينتەگراتسيالىق ءىس- قيمىلدارىمىزدى تەرەڭدەتۋگە سەپتىگىن تيگىزەدى دەپ سەنەمىن»، - دەلىنگەن جەدەلحاتتا.