ۆلاديمير پۋتين: استانا - نۇرسۇلتان نازاربايەۆتىڭ وراسان زور جۇمىسىنىڭ جەمىسى
«حابار» ارناسىنداعى ەرلان بەكحوجيننىڭ «ۇلى دالانىڭ استاناسى» اتتى دەرەكتى فيلمىندە رەسەي فەدەراتسياسىنىڭ پرەزيدەنتى ۆلاديمير پۋتين وسىلاي دەپ اتاپ ءوتتى، دەپ حابارلايدى قازاقپارات ءتىلشىسى.
«مەن استاناعا شامامەن ەكى مىڭىنشى جىلداردىڭ باسىندا كەلگەن ەدىم. قالانىڭ قالاي دامىعانىن، جاڭا تاۋەلسىز ءارى ەگەمەن قازاقستاننىڭ قالاي قالپىنا كەلتىرىلگەنىن ءوز كوزىممەن كوردىم دەسەم دە بولادى. البەتتە، كوپتەگەن ادامدار دا بىلەتىن بولار. ءاۋ باستا بۇل قالا شاعىن كەڭەستىك قالا بولاتىن. ال سوڭعى 20 جىلدا اتقارىلعان جۇمىستار - عاجايىپ دەپ اتاماساڭىز، قازاقستاننىڭ عانا ەمەس، بۇكىل ايماقتىڭ ومىرىندەگى جارقىن وقيعا دەپ اتاۋعا بولادى»، - دەيدى رەسەي فەدەراتسياسىنىڭ پرەزيدەنتى.
ۆلاديمير پۋتيننىڭ ايتۋىنشا، استانا - تاۋەلسىز مەملەكەتتىڭ ماقتان تۇتارلىق ورتالىعىنا اينالعان.
«استاناداعى زامانعا ساي ساۋلەت پەن ۇلتتىق مانەر تۇيىسەدى. ەكىنشىدەن، استانادا ءبارى دە جوسپار بويىنشا دامىپ كەلەدى. I پەتر كەزىندە دە پەتەربۋرگ تە وسىلاي دامىعان بولاتىن. سەبەبى، قالانىڭ دامۋ داڭعىلىن ءبارى دە كورىكتى ءارى ۇيلەسىمدى ەتىپ جاسارلىق بارلىق جاعداي بار. سوندىقتان، بۇل استانا - قازاقستاننىڭ ۇلكەن جەتىستىگى دەپ ويلايمىن. ارينە، سونداي- اق بۇل - قازاقستان پرەزيدەنتى نۇرسۇلتان ءابىش ۇلى نازاربايەۆتىڭ وراسان زور جۇمىسىنىڭ جەمىسى»، - دەدى ۆلاديمير پۋتين.
ايتا كەتسەك، ەرلان بەكحوجيننىڭ «ۇلى دالانىڭ استاناسى» اتتى دەرەكتى فيلمىندە پوستكەڭەستىك ەلدەردىڭ باسشىلارى قازاقستان پرەزيدەنتى نۇرسۇلتان نازاربايەۆ پەن استانا قالاسى تۋرالى ءوزىنىڭ وي-پايىمدارىمەن بولىسكەن.