اتىراۋلىقتار استانانىڭ كەلبەتىن سەنسورلىق ەكراننان تاماشالاۋدا
«بۇل كورمە ەلوردامىزدىڭ 20 جىل ىشىندە دامۋ جولدارى مەن تاريحي كەزەڭدەرىن ناسيحاتتاۋ ارقىلى استانانىڭ ابىرويىن اسقاقتاتۋ، تاۋەلسىزدىگىمىزدىڭ بويتۇمارى - استانا كۇنىنىڭ ەل ومىرىندەگى تاريحي وقيعالار تىزبەگىنەن ورىن الاتىن ەرەكشە كۇن ەكەنىن ۇعىندىرۋ ماقساتىندا ۇيىمداستىرىلىپ وتىر. ەلىمىزدىڭ باس قالاسى اتانعان استانانىڭ تۋعان كۇنىندە وبلىستىڭ رۋحانياتىن ناسيحاتتاۋ ماقساتىندا تاريحي- ولكەتانۋ مۋزەيى جىل سايىن حالىق نازارىنا ۇسىنىپ، ءوز ۇلەسىن قوسىپ كەلەدى»، - دەيدى مۋزەي باسشىسىنىڭ ورىنباسارى سايا عازيموۆا.
تۇراقتى ەكسپوزيتسيادا مەملەكەت استاناسىن كوشىرۋ، اتاۋىن وزگەرتۋ جونىندەگى تاريحي قۇجاتتار، استانانىڭ قۇرىلىسى مەن دامۋى، وركەندەۋى جولىنداعى عيماراتتار، الەمدىك شارالار، ماڭىزدى كەزدەسۋلەر، حالىقارالىق مامانداندىرىلعان «ەكسپو-2017» كورمەسى، اتىراۋ وبلىسى تاريحي- ولكەتانۋ مۋزەيىنىڭ ءار جىلداردا استانا قالاسىندا ۇيىمداستىرىلعان كوشپەلى كورمەلەرىنەن سىر شەرتەتىن فوتوسۋرەتتەر، كىتاپتار، زاتتاي جادىگەرلەر جانە استانا قالاسىنىڭ ورتالىق الاڭىنىڭ ماكەتى ورنالاستى.
«اتىراۋ وبلىسى «ەكسپو-2017» كورمەسىنەن 30 عا تارتا جوبانى جۇزەگە اسىردى. اتاپ ايتقاندا، ەكسپو-2017» كورمەسىندە كوتەرىلگەن يدەيالار، «جاسىل ەكونوميكا»، بالامالى ەنەرگەتيكانى دامىتۋ، قورشاعان ورتاعا ءوندىرىس ورىندارىنىڭ تيگىزەر اسەرىن تومەندەتۋ بويىنشا جوبالار اتىراۋ وبلىسىندا دا جۇزەگە اسىرىلدى. كورمەگە اتىراۋ وبلىسىنان 83 مىڭ ادام قاتىستى. استاناداعى اتىراۋ وبلىسىنىڭ كۇندەرى اياسىندا 1 مىڭعا جۋىق ءوڭىر تۇرعىنى وزدەرىنىڭ ونەرلەرىن ەلوردا تورىندە پاش ەتتى»، - دەيدى ەكسپوزيتسيالىق كورمە جۇمىس ءبولىمىنىڭ مەڭگەرۋشىسى ج. سەيىتمۇحامبەتوۆا.
ايتا كەتكەن ءجون، ەكسپوزيتسيادا قامتىلماعان استانا قالاسى تۋرالى تولىق مالىمەت قازاق، ورىس، اعىلشىن تىلدەرىندە جانە فوتوسۋرەتتەر سەنسورلىق ەكرانعا ورناتىلدى.
«استانا - ۇلان عايىر ەلىمىزدىڭ باس قالاسى، الەم تانىعان جاس قالا. بۇگىنگى ەكسپوزيتسيالىق كورمە وتە جوعارى دەڭگەيدە ۇيىمداستىرىلعان. ءوزىم استاناعا بارماسام دا، نەمەرە- جيەندەرىممەن كورمە ارقىلى تانىستىرىپ ءجۇرمىن. وتكەن اپتادا ەركە ەسىلدىڭ جاعالاۋىندا ءبىزدىڭ مۇنايلى اتىراۋىمىزدىڭ تارتۋى - كوپىرىمىز اشىلدى. اسەم قالامىز استانامىزدى 20 جاسىمەن قۇتتىقتايمىن»، - دەيدى كورمەنى تاماشالاۋشى س. قايىرعاليەۆا.