قازاقستان مەن سينگاپۋردىڭ ساۋدا- ەكونوميكالىق ىنتىماقتاستىعى تالقىلاندى

استانا. قازاقپارات - بۇگىن ۇكىمەت ۇيىندە ق ر پرەمەر-ءمينيسترى باقىتجان ساعىنتايەۆ سينگاپۋردىڭ قازاقستانداعى رەزيدەنت ەمەس ەلشىسى زۋلكيفلي باحارۋدينمەن كەزدەستى.

بۇل تۋرالى primeminister.kz حابارلاندى.

كەزدەسۋ بارىسىندا جاسىل ەكونوميكانى، بيزنەستى، لوگيستيكانى جانە قارجى جۇيەسىن دامىتۋ سالالارىنداعى ساۋدا- ەكونوميكالىق جانە ينۆەستيتسيالىق ىنتىماقتاستىقتى كەڭەيتۋ ماسەلەلەرى تالقىلاندى. قازاقستان مەن سينگاپۋر اراسىندا 25 جىل ىشىندە بارلىق باعىتتار بويىنشا سىندارلى ديالوگ ورناعان، ەكىجاقتى قارىم- قاتىناستى دامىتۋدا جانە حالىقارالىق ۇيىمدار اياسىندا ءوزارا ءىس- قيمىل جاساۋدا وڭ ءۇردىس قالىپتاسقان.

سونداي-اق، كەزدەسۋگە قاتىسۋشىلار سوت جۇيەسىنە سيفرلىق تەحنولوگيالاردى ەنگىزۋ جانە Smart City جوبالارىن ىسكە اسىرۋداعى تابىستىلىق تۋرالى تاجىريبە الماستى.

 

ب. ساعىنتايەۆ قازاقستان سينگاپۋردى وڭتۇستىك- شىعىس ازيا مەن ا س ە ا ن ايماعىنداعى نەگىزگى سەرىكتەس رەتىندە قاراستىراتىنىن اتاپ ءوتتى. سينگاپۋردىڭ ساۋدا جانە قارجى، كولىك- لوگيستيكالىق حاب رەتىندەگى جالپىعا تانىلعان بەدەلىن ەسكەرە وتىرىپ، ساۋدا- ەكونوميكالىق جانە ينۆەستيتسيالىق ىنتىماقتاستىقتى كەڭەيتۋ ەكىجاقتى قارىم- قاتىناستىڭ باسىم سالاسى بولىپ قالا بەرمەك.

پرەمەر- مينيستر وتكەن جىلى $123,7 ميلليون قۇراعان ەكىجاقتى تاۋار اينالىمىنىڭ ديناميكاسىنداعى وڭ وزگەرىستەردى اتاپ ءوتتى. سوڭعى ۋاقىتتا ەكىجاقتى قارىم- قاتىناس ايتارلىقتاي جاندانا ءتۇستى. بۇدان وزگە، قازاقستاندىق نارىقتا سينگاپۋرلىق ينۆەستورلار ءۇشىن ەۋرازيالىق ەكونوميكالىق وداق جاڭا مۇمكىندىكتەر اشۋدا. قازاقستان سينگاپۋردىڭ ە ا ە و- مەن ەركىن ساۋدا تۋرالى كەلىسىم جاساسۋ جونىندەگى باستاماسىن قولدايدى.

سونىمەن قاتار، قازىرگى تاڭدا قازاقستاننىڭ ءبىرجاقتى تارتىپتە سينگاپۋر ازاماتتارىنا ۆيزالىق رەجىمدى 30 كۇنگە دەيىن الىپ تاستاۋىنا بايلانىستى ىسكەرلىك بايلانىستار كەڭەيىپ جاتقانى بايقالۋدا.

2016 -جىلى ءوزارا ساۋدا- ساتتىق $91,4 ميلليون قۇرادى. ەكى ەل اراسىنداعى تاۋار اينالىمى وتكەن جىلى $123,7 ميلليون قۇرادى، سونىڭ ىشىندە ەكسپورت - $86,5 ميلليون. 2018 -جىلدىڭ ءى توقسانىنداعى تاۋار اينالىمى $28,1 ميلليون بولدى.