تاۋدا دەمالىپ جاتقان دارىگەرلەر جاراقاتتانعان ادامداردى قۇتقاردى
ابىروي بولعاندا ولارعا جاقىن ارادا دەمالىپ جاتقان دارىگەرلەر كومەككە كەلگەن، دەپ حابارلايدى قازاقپارات ءتىلشىسى.
وقىس وقيعا تۋرالى فەيسبۋكتە الماتى تۇرعىنى گۋلزيا بۋرشۋكوۆا جازعان بولاتىن.
ونىڭ ايتۋىنشا، دەمالۋعا كەلگەن ايەلدەردىڭ ءبىرى دوپ تەۋىپ ءجۇرىپ، قولىن جارالاپ العان.
سونىمەن قاتار، تاعى ءبىر قالا تۇرعىنى ۆەلوسيپەدىمەن ارىققا قۇلاپ كەتكەن. سونىڭ سالدارىنان ەر ادامنىڭ اياعىنان قان توقتامادى. سول ساتتە، جاقىن ارادا دەمالىپ جاتقان دارىگەرلەر ءوز شارۋالارىن تاستاي سالىپ، ەكى ادامعا لەزدە كاسىبي تۇردە مەديتسينالىق كومەك كورسەتكەن.
«ءبىز ولاردان كومەك سۇراعان كەزدە ولار تەك «قايدا؟» دەپ سۇرادى. ءبىرى چەمودانىن الىپ، ەكىنشىسى ونىڭ ارتىنان ەرىپ وتىردى. قاي كەزدە دە كاسىبي دايارلىقتى كورسەتۋ دەگەن وسى ەمەس پە؟ ولاردىڭ مەرەكەلەرى كوڭىلدى ءوتتى. سەبەبى ولار ادام ءومىرىن قۇتقارىپ قالدى. دارىگەر ءۇشىن ەڭ باستىسى وسى ەمەس پە؟!»، - دەدى ول.
الماتى تۇرعىنى جازباسىنىڭ سوڭىندا اق حالاتتى ابزال جاندارعا العىسىن ءبىلدىردى.
وسىعان وراي قالالىق جەدەل جاردەم ستانساسىنىڭ باسپا ءسوز قىزمەتى بولعان وقيعا تۋرالى تۇسىنىكتەمە بەردى.
«سول كۇنى الماتى قالالىق جەدەل جاردەم ستانساسى №5-بولىمشەسىنىڭ دارىگەرلەرى مەن فەلدشەرلەرى مەديتسينا قىزمەتكەرلەرى كۇنى قارساڭىندا تاۋعا دەمالىسقا شىققان. ولار ۇنەمى العاشقى كومەك كورسەتۋ قۇرالدارىن، مەديكامەنتتەردى وزدەرىمەن بىرگە الىپ جۇرەدى. سونىڭ ارقاسىندا ەكى ادامعا قاجەتتى كومەك كورسەتە الدى»، - دەدى جەدەل جاردەم ستانساسىنىڭ باسپا ءسوز حاتشىسى گاۋحار نوكەربەكوۆا.