جاياۋ مۇسانىڭ قوبىزى مەن قويىن داپتەرى، ءماشھۇردىڭ بويتۇمارى - پاۆلودار مۋزەيى استانادا

 استانا. قازاقپارات - استانادا قولجازبالار مەن سيرەك كىتاپتار ۇلتتىق ورتالىعىندا «استانا - الاش ارمانى» تاقىرىپتىق كورمەسى اشىلدى، دەپ حابارلايدى قازاقپارات ءتىلشىسى.

ۋاقىتشا كورمەنى ۇلتتىق ورتالىق پاۆلودار وبلىسىنىڭ «بۇقار جىراۋ اتىنداعى ادەبيەت جانە ونەر مۋزەيىمەن بىرلەسىپ ۇيىمداسىرعان. مۇندا پاۆلودار وڭىرىنەن شىققان اتاقتى تۇلعالار - ءماشھۇر ءجۇسىپ كوپەيەۆ، جۇسىپبەك ايماۋىتوۆ، سۇلتانماحمۇت تورايعىروۆ جانە جاياۋ مۇسا مەن ەستايدىڭ جەكە بۇيىمدارى، تۇتىنعان زاتتارى قويىلعان.

 «بۇل كورمە استانانىڭ 20 جىلدىعىنا ارنالىپ وتىر. سونداي- اق، بيىل پاۆلودار ءوڭىرىنىڭ 80 جىلدىعى تويلانادى. پاۆلوداردان شىققان ءماشھۇر ءجۇسىپ كوپەي ۇلىنىڭ تۋعانىنا - 160 جىل، بۇقار جىراۋعا- 350 جىل، ەستاي بەركىمبايەۆتىڭ تۋعانىنا - 145 جىل تولادى. وسى اتاۋلى داتالار اياسىندا كوپتەگەن شارالاردى قولعا الىپ، كورمەلەر وتكىزىپ ءجۇرمىز. بۇگىنگى كورمەنى ناعىز رۋحاني جاڭعىرۋ باعدارلاماسىنىڭ شاراسى دەپ اتاۋعا بولادى، سەبەبى وسكەلەڭ ۇرپاققا وسى جادىگەرلەردى، اسىل مۇرالارىمىزدى دارىپتەۋ تىكەلەي مىندەتىمىز دەپ ويلايمىن» ، - دەدى پاۆلودار وبلىسىنىڭ «بۇقار جىراۋ اتىنداعى ادەبيەت جانە ونەر مۋزەيىنىڭ ديرەكتورى جەڭىس مولدابەكوۆ كورمەنىڭ اشىلۋ سالتاناتىندا.

 قۇندى جادىگەرلەر اراسىندا ايگىلى سازگەر- ءانشى جاياۋ مۇسانىڭ قوبىزى مەن قويىن داپتەرى، ءماشھۇر ءجۇسىپ كوپەي ۇلىنىڭ بويتۇمارى، ەستاي اندەرىنىڭ ءتۇپنۇسقا نوتالارى بار. ودان بولەك، كورمەدەن جۇسىپبەك ايماۋىتوۆتىڭ ءوز قولىمەن جاساعان سىزعىشىن، «سيۋزانە» كىلەمىن، يسا بايزاقوۆتىڭ شاپانى مەن تۇتىنعان زاتتارىن، سۇلتانماحمۇت تورايعىروۆتىڭ شىعارمالار جيناعىن جانە شاكەن ايمانوۆتىڭ تۇسىرىلىمدە كيگەن بورىگىن كورۋگە بولادى.

كورمە ەلورداداعى قولجازبالار مەن سيرەك كىتاپتار ۇلتتىق ورتالىعىندا ءبىر اي بويى جالعاسادى جانە ونى كەز كەلگەن ادام تەگىن تاماشالاي الادى.