ەلباسىنىڭ قاتىسۋىمەن «استانا» ح ق و- نىڭ رەسمي اشىلۋى وتۋدە

استانا. قازاقپارات - ەلورداداعى كونگرەسس حولل ورتالىعىندا ەلباسى نۇرسۇلتان نازاربايەۆتىڭ قاتىسۋىمەن «استانا» حالىقارالىق قارجى ورتالىعىنىڭ رەسمي اشىلۋ ءراسىمى باستالدى، دەپ حابارلايدى قازاقپارات ءتىلشىسى.

ا ح ق و- نىڭ رەسمي اشىلۋى Astana Finance Days فورۋمىنىڭ نەگىزگى شاراسى سانالادى. سالتاناتتى شاراعا ءابۋ ءدابيدىڭ مۇراگەر حانزاداسى شەيح مۇحاممەد بەن زايد ءال ناحايان، ءىرى حالىقارالىق كومپانيالاردىڭ باسشىلارى، عىلىمي ورتا مەن ساراپشىلىق ورتالىقتاردىڭ ساراپشىلارى قاتىسىپ جاتىر.

ايتا كەتەيىك، اعىمداعى جىلى شامامەن 100 كومپانيا تىركەلەدى دەپ جوسپارلانعان. قازىردىڭ وزىندە 1 شىلدەگە دەيىن 50 كومپانيا تىركەلىپ ۇلگەرگەن. ال 2020-جىلى ولاردىڭ سانى 500 دەن اسىپ جىعىلۋى ءتيىس.

ەستەرىڭىزگە سالا كەتسەك، 2015-جىلعى جەلتوقساندا قازاقستان پرەزيدەنتى نۇرسۇلتان نازاربايەۆ «استانا» حالىقارالىق قارجى ورتالىعىن قۇرۋ تۋرالى كونستيتۋتسيالىق زاڭعا قول قويدى. ا ح ق و- نىڭ ماقساتى - قارجىلىق قىزمەتتەردى كورسەتەتىن حالىقارالىق دەڭگەيدەگى جەتەكشى ورتالىق قالىپتاستىرۋ. پوستكەڭەستىك كەڭىستىكتە تۇڭعىش رەت اعىلشىن قۇقىعىنىڭ قاعيداتتارى ەنگىزىلەدى، قارجى ورتالىعىنىڭ رەسمي ءتىلى - اعىلشىن ءتىلى بولادى.

ا ح ق و- نىڭ مىندەتتەرى - قارجىلىق قىزمەتتەر سالاسىندا ينۆەستيتسيالاۋ ءۇشىن تارتىمدى ورتا قۇرۋ ارقىلى ەل ەكونوميكاسىنا ينۆەستيتسيالار تارتۋعا جاردەمدەسۋ، قازاقستان رەسپۋبليكاسىنىڭ باعالى قاعازدار نارىعىن دامىتۋ، ونىڭ حالىقارالىق كاپيتال نارىقتارىمەن ىقپالداسۋىن قامتاماسىز ەتۋ.

اۆتور: مارلان جيەمباي