ورالمانداردىڭ ەڭبەك ءوتىلى نەگە ەسەپتەلمەيدى
«بۇل - وتە ماڭىزدى سۇراق. قازىر ءبىز بىرنەشە ەلمەن جۇمىس ىستەپ جاتىرمىز. نەگىزى، ءبىز ورالمانداردىڭ ەڭبەك ءوتىلىن تولىق تۇردە ساناۋعا دايىنبىز. ءبىراق ءبىرقاتار قيىنشىلىقتار بار. ماسەلەن، قىتايدا ەڭبەك كىتاپشاسى جوق ەكەن. سونىڭ سالدارىنان قىتايدان كەلگەن قانداستارىمىز ەڭبەك ءوتىلىن كورسەتە الماي جۇرەدى. سول سەبەپتى ءبىز قىتايدىڭ مەملەكەتتىك ورگاندارىنا ارنايى حات جازدىق. ولارمەن ءبىر كەلىسىمگە كەلۋىمىز كەرەك. ءبىز قانداستارىمىزدىڭ ەڭبەك ءوتىلىن تولىعىمەن ەسكەرۋگە ءازىرمىز. سونداي حاتتى جىبەردىك. ولار كەلىسىم بەرسە، ەڭبەك ءوتىلىن وسىنداي رەتپەن سانايتىن بولامىز»، - دەدى م. ءابىلقاسىموۆا استانادا وتكەن باسپا ءسوز ءماسليحاتىندا.
ءمينيستردىڭ ايتۋىنشا، ورالمانداردىڭ ەڭبەك ءوتىلىن ەسەپتەۋ ماسەلەسى شەشىلسە، بازالىق زەينەتاقى جانە تاعى باسقا الەۋمەتتىك تولەمدەردىڭ ۇلعايعان مولشەرىن الۋعا مۇمكىندىك بولادى. «ورالمانداردىڭ كوبىسى موڭعوليادان، قىتايدان، وزبەكستاننان، رەسەيدەن، ءتىپتى گەرمانيادان كەلىپ جاتىر»، - دەپ اتاپ كورسەتتى م. ءابىلقاسىموۆا.
ايتا كەتەيىك، قازاقستاندا 1- شىلدەدەن باستاپ بازالىق زەينەتاقىنى ەسەپتەۋدىڭ جاڭا جۇيەسى كۇشىنە ەندى. وعان سايكەس، ءبىر ميلليونعا جۋىق زەينەتكەردىڭ بازالىق زەينەتاقىسى ەكى ەسەگە ءوستى.
«ماسەلەن، زەينەتكەردىڭ ەڭبەك ءوتىلى بولماسا، سوسىن زەينەتاقى جيناقتاۋ جۇيەسىنە مۇلدەم قاتىسپاسا، ءيا بولماسا، ەڭبەك ءوتىلى 10 اق جىل بولسا، وعان جاڭاعى ەڭ تومەنگى كۇنكورىس دەڭگەيىنىڭ 54 پروتسەنتىن - 15274 تەڭگەنى تولەنە بەرەدى. ال 10 جىلدان ارتىق ەڭبەك ءوتىلى بار ادامعا قوسىمشا ءاربىر جىل ءۇشىن 2 پروتسەنت قوسىلادى. سوندا 33 جىلدىق ەڭبەك ءوتىلى بار ادام بازالىق زەينەتاقىنىڭ تولىق مولشەرىن - 28284 تەڭگەنى الا الادى. ءاربىر ادام ءوزىنىڭ زەينەتاقى مولشەرىن «ەلەكتروندى ۇكىمەت» پورتالىنان، ءيا بولماسا، «ازاماتتارعا ارنالعان ۇكىمەتتىڭ» فرونت كەڭسەلەرىنەن بىلە الادى. سول جەردە تولىق انىقتامانى دا الۋعا مۇمكىندىك بار. بۇگىندە قايتا ەسەپتەۋ شارالارى اتقارىلىپ، ءاربىر ادامنىڭ زەينەتاقىسى اۆتوماتتى تۇردە بەلگىلەندى. سوندىقتان قوسىمشا قۇجاتتاردى اكەلۋدىڭ قاجەتى جوق»، - دەيدى ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى سۆەتلانا جاقىپوۆا.