ۇكىمەت وتىرىسىندا «نۇرلى جول» باعدارلاماسى جاڭارتىلدى

استانا. قازاقپارات - بۇگىن ۇكىمەت وتىرىسىندا «نۇرلى جول» مەملەكەتتىك باعدارلاماسىنىڭ تۇزەتىلگەن جوباسى بەكىتىلدى، دەپ حابارلايدى قازاقپارات ءتىلشىسى.

«جالپى، باعدارلامانى ىسكە اسىرۋ بارىسى ۇكىمەتتە بىرنەشە مارتە جان- جاقتى تالقىلاندى. مەملەكەتتىك باعدارلامانىڭ تۇزەتىلگەن جوباسىندا ەلباسى قويعان مىندەتتەر كورىنىس تاپتى. سول سەبەپتەن ينفراقۇرىلىمدى دامىتۋدىڭ «نۇرلى جول» مەملەكەتتىك باعدارلاماسىنىڭ تۇزەتىلگەن جوباسىنا داۋىس بەرەمىز»، - دەدى باقىتجان ساعىنتايەۆ.

وسى ورايدا ۇكىمەت مۇشەلەرى جوبانى ءبىراۋىزدان بەكىتۋ تۋرالى شەشىم قابىلدادى.

«بارلىق مۇددەلى مەملەكەتتىك ورگاندارعا جاڭارتىلعان باعدارلامانىڭ ورىندالۋىن تاپسىرامىن. اسقار ۇزاقباي ۇلى (پرەمەر- ءمينيستردىڭ ءبىرىنشى ورىنباسارى - اۆت. )، باعدارلامانىڭ ورىندالۋىن قامتاماسىز ەتۋدى تاپسىرامىن. بۇل باعىتتاعى جۇمىستاردى باقىلاۋدا ۇستاڭىز»، - دەدى ۇكىمەت باسشىسى.

ق ر ۇلتتىق ەكونوميكا ءمينيسترى تيمۋر سۇلەيمەنوۆتىڭ سوزىنە قاراعاندا، «نۇرلى جول» مەملەكەتتىك باعدارلاماسىن ىسكە اسىرۋعا 2018 -جىلى بارلىق قارجىلاندىرۋ كوزدەرىنەن 829,5 ميلليارد تەڭگە كوزدەلگەن. 2018 -جىلعى 1 - شىلدەدەگى جەدەل دەرەكتەر بويىنشا، ونىڭ 167,1 ميلليارد تەڭگەسى، ياعني شامامەن 21 پايىزى يگەرىلدى.

«سونىمەن قاتار، مەملەكەت باسشىسىنىڭ 2017 -جىلدىڭ 31 - قاڭتارىنداعى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىنىڭ جالپى ۇلتتىق ءىس- شارالار جوسپارىنىڭ 13-تارماعىنا سايكەس، مينيسترلىك ءتيىستى قاۋلى جوباسىن ازىرلەدى. جوبامەن ترانزيت كولىگىنەن تۇسكەن كىرىستەردى 4 ميلليارد ا ق ش دوللارىنا دەيىن ۇلعايتۋ جانە ترانزيتتىك كونتەينەرلىك تاسىمالداۋ كولەمىن 1,2 ميلليون ج ف ب- عا (جيىرما فۋنتتىق بالاماعا) دەيىن ارتتىرۋ تۋرالى ءتيىستى وزگەرىستەر مەن تولىقتىرۋلار كوزدەلدى. مۇنىمەن قوسا، ترانزيتتىك اۋە جولاۋشىلارىنىڭ سانى 1,6 ميلليون ادامعا، ال ايماقتىق اۋە جەلىلەرىمەن جولاۋشىلار سانىن 170 مىڭعا دەيىن ارتتىرۋ كوزدەلدى. قويىلعان ماقساتتارعا قول جەتكىزۋ ءۇشىن تاۋارلاردى ترانزيتتەۋگە، كولىك دالىزدەرىن قۇرۋ مەن جاڭعىرتۋعا، كولىك ينفراقۇرىلىمىن باسقارۋعا، قىزمەت كورسەتۋ دەڭگەيىن كوتەرۋگە جانە اكىمشىلىك كەدەرگىلەردى جويۋعا باعىتتالعان شارالار كوزدەلگەن. جوبا استانا جانە الماتى قالالارىنىڭ، وبلىستار اكىمدىكتەرىمەن جانە مۇددەلى مەملەكەتتىك ورگاندارمەن كەلىسىلدى»، - دەدى تيمۋر سۇلەيمەنوۆ.

اۆتور: رۋسلان عابباسوۆ