الماتى تاۋلارىندا سەرۋەندەپ ءجۇرىپ اداسىپ قالعان عاشىقتار قۇتقارىلدى

 استانا. قازاقپارات - الماتىلىق قۇتقارۋشىلار كىماسار شاتقالىندا ءجۇرىپ اداسىپ قالعان جىگىت پەن قىزدى قۇتقاردى.

1 - شىلدەدە ساعات 22:50 دە الماتىلىق قۇتقارۋ قىزمەتىنىڭ «109» نومىرىنە ايەل حابارلاسىپ، ءوزىنىڭ 17 جاستاعى ۇلى 16 جاستاعى قىزبەن بىرگە تاۋدا اداسىپ قالعانىن جانە قايتار جولدى تابا الماي جۇرگەندەرىن ايتقان.

«كىماسار شاتقالىنىڭ اۋماعىنا قۇتقارۋشىلار اتتاندى. ءبىر تەحنيكا مەن 5 قۇتقارۋشى جۇمىلدىرىلدى. ءبىراز ۋاقىتتان كەيىن قۇتقارۋشىلار توبى اداسىپ قالعان جاستاردى تاپتى. ولارعا مەديتسينالىق كومەك قاجەت بولمادى.

انىقتالعانداي، جاستار كۇندىز تاۋعا سەرۋەندەۋگە بارعان. ولار بۋتاكوۆكا اۋدانىنان تاۋعا كوتەرىلىپ، «مەدەۋگە» دەيىن جەتۋدى ۇيعارعان. ارتىنشا قاراڭعى ءتۇسىپ، ولار باعىتتان اداسىپ قالعان» ، - دەيدى قۇتقارۋ قىزمەتىندەگىلەر.

مۇنان كەيىن قۇتقارۋشىلار جىگىت پەن قىزدى «مەدەۋگە» دەيىن جەتكىزىپ سالعان. ول جەردە جاستاردى اتا- اناسى كۇتىپ العان ەكەن.