ترامپ: ساۋد ارابياسى مۇناي ءوندىرۋدى ۇلعايتۋعا كەلىستى
«جاڭا عانا ساۋد ارابياسى كورولى سالمانمەن سويلەستىم، وعان يران مەن ۆەنەسۋەلاداعى بىلىققا بايلانىستى قازىرگى جاعدايدى ەڭسەرۋ ءۇشىن ساۋد ارابياسىنان مۇناي ءوندىرۋدى، بالكىم 2 ميلليون باررەلگە ۇلعايتۋدى سۇرايتىنىمدى ءتۇسىندىردىم. باعا تىم جوعارى! ول كەلىستى!»، - دەپ جازعان ترامپ Twitter الەۋمەتتىك جەلىسىندەگى پاراعىنا.
Reuters اگەنتتىگى وندىرىلەتىن مۇناي كولەمىن مۇنشاما ۇلعايتۋ ادەتتەن تىس كوپ ەكەنىن جانە ساۋد ارابياسى بۇل اقپاراتتى ازىرشە رەسمي تۇردە راستاماعانىن حابارلاعان.
ساۋد ارابياسى - الەمدەگى ءىرى مۇناي ءوندىرۋشى ءارى OPEC ۇيىمىنا مۇشە مەملەكەتتەر اراسىندا نەگىزگى ەكسپورتتاۋشى ەل. بۇدان ءبىر اپتا بۇرىن OPEC ۇيىمىنىڭ نەگىزگى ارىپتەستەرى مەن وداقتاستارى 2017 -جىلدىڭ باسىنان بەرى ءبىرقاتار وندىرۋشىلەردىڭ جىبەرگەن ولقىلىقتارىنىڭ ورنىن تولتىرۋ ءۇشىن نارىققا شىعارىلاتىن مۇناي كولەمىن ۇلعايتۋعا كەلىسىپ، شيكىزات ءوندىرۋدى بارلىق تاراپتىڭ كوڭىلىنەن شىعاتىن شامادا كوبەيتۋ تۋرالى ۋاعدالاسقان بولاتىن. OPEC رەسمي وكىلدەرى تاۋلىگىنە وندىرىلەتىن مۇناي كولەمى 700 مىڭنان 1 ميلليون باررەلگە دەيىن كوبەيۋى ىقتيمال دەپ ايتا باستاعان. ترامپتىڭ ساۋد ارابياسىنان ءوتىنىپ وتىرعان 2 ميلليون باررەل نارىققا تۇسپەكشى بولجامدى شامادان ەكى ەسە ارتىق دەپ جازادى Reuters.
ساۋد ارابياسىنىڭ مەملەكەتتىك باسپا ءسوز قۇرالدارى كورول سالمان مەن ا ق ش پرەزيدەنتىنىڭ تەلەفونمەن اڭگىمەسى كەزىندە ەكى ليدەردىڭ «مۇناي بازارىنداعى تۇراقتىلىقتى» ساقتاۋ جانە مۇناي وندىرۋشىلەردىڭ «كەز كەلگەن تاپشىلىقتى وتەۋگە» باعىتتالعان كۇش- جىگەرىن قولداۋ قاجەتتىگىن ايتقانى تۋرالى حابارلادى.
ساۋد ارابياسىنىڭ باسپا ءسوز قۇرالدارى سەنبى كۇنى كەشكى حابارلارىندا تاۋلىگىنە وندىرىلەتىن مۇناي كولەمىن 2 ميلليون باررەلگە كوبەيتۋ تۋرالى ەشقانداي اقپارات تاراتقان جوق. مۇناي ونەركاسىبىنە قاتىسى بار رەسمي تۇلعالار كوممەنتاري بەرۋدەن ازىرشە باس تارتىپ وتىر.
www.azattyq.org