ون ەلدىڭ قۋىرشاق تەاترى استاناداعى فەستيۆالدا باس قوسادى
قازاقستاننىڭ قۋىرشاق ونەرىندەگى ءبىرىنشى كاسىپقوي رەجيسسەرى، قازاقستان رەسپۋبليكاسىنىڭ ەڭبەك سىڭىرگەن ءارتىسى، استانا قالاسىنىڭ مەملەكەتتىك قۋىرشاق تەاترىنىڭ كوركەمدىك جەتەكشىسى قۇرالاي ەشمۇراتوۆانىڭ اتىنداعى II «قۇرالاي» قۋىرشاق تەاترى حالىقارالىق فەستيۆالىنە تۋنيس، بوسنيا جانە گەرتسەگوۆينا، بەلگيا، يتاليا، پولشا، رەسەي، تۇركيا، ەستونيا، سەربيا، قازاقستاننىڭ ۇجىمدارى قاتىسادى. تەاترلار 1-4 -شىلدەدە ەلوردالىق قۋىرشاق تەاترىنىڭ ساحناسىندا ونەر كورسەتەدى.
فەستيۆال رەسپۋبليكا داڭعىلىنىڭ بويىمەن «جاستار» سارايىنان تەاترعا دەيىن قاتىسۋشىلار شەرۋىمەن باستالادى. قالانىڭ كەڭ كوشەلەرىمەن ۇلتتىق كيىم كيگەن بالالار مەن ارتىستەردىڭ سۇيەمەلدەۋىمەن ۇرمەلى اسپاپتار وركەسترى، بويشاڭ قۋىرشاقتار، «زارا» شوۋ- بالەتىنىڭ ارتىستەرى، اعاشاياق مىنگەندەر شوۋى ءجۇرىپ وتەدى. شەرۋ 1 -شىلدەدە ساعات 10:30-دا باستالادى.
فەستيۆال باعدارلاماسىنىڭ ءبىرىنشى سپەكتاكلى ساعات 13.30-دا كورسەتىلەدى. مەملەكەتتىك الماتى قۋىرشاق تەاترى كورەرمەندەر نازارىنا «قاڭباق شال» حالىق ەرتەگىسىن قويادى. ەكى ساعاتتان كەيىن «ادادجو» ساحنالىق مينياتيۋراسى كوپشىلىك نازارىنا ۇسىنىلادى. بۇل رەسەي مەملەكەتتىك ساحنالىق ونەر ينستيتۋتىنىڭ قۋىرشاق تەاترى فاكۋلتەتىنىڭ جانە «كۋلتۋرنا ستسەنا مالي ستۆاري ترەبينە» (بوسنيا جانە گەرسەگوۆينا) تەاترىنىڭ بىرلەسكەن شىعارماشىلىق جوباسى. قوناقتاردىڭ ءبىرى قويىلىمدى تاماشالاسا، باسقالارى سەرب رەجيسسەرى امەلا ۆۋچەنوۆيچتىڭ «قۋىرشاق جانە بالا»، «ادامگەرشىلىككە تاربيەلەۋ»، «قۋىرشاق ويناتۋشى ءارتىستىڭ ونەرى» شەبەرلىك دارىستەرىنە قاتىسا الادى. فەستيۆالدىڭ ءبىرىنشى كۇنى يتاليالىق «ۆەردي» قۋىرشاق تەاترىنىڭ ينتەراكتيۆتى شوۋىمەن اياقتالادى.
2 -شىلدەدە ساعات 10.00-دە كورەرمەندەر ىستانبۇلدىق (تۇركيا) «قاراكوز» قۋىرشاق تەاترىنىڭ ورىنداۋىنداعى «قوقىس قۇبىجىعى» قويىلىمىن كورە الادى. سودان كەيىن سانكت- پەتەربورلىق ۆيكتور انتونوۆ «جىپتەگى سيرك» كورسەتەدى. سونىمەن قاتار، كۇندىزگى باعدارلاماعا ەستونيالىق «Projekt» تەاترىنىڭ «ۋمكا» قويىلىمى جانە «MarekWaszkiel» پولياك تەاترىنىڭ «پوبۋدكا، پودەم ي سيانيە» تۋىندىسى ەنگىزىلدى.
3 -شىلدەدە فەستيۆال تۋنيس ۇلتتىق قۋىرشاق ونەرى ورتالىعىنىڭ «كەزدەسۋ» قويىلىمىمەن جالعاسادى. بەلگيالىق «FigurenTheatreVlinders» تەاترى «كىشكەنتاي قارا بالاپان تۋرالى حيكايانى» كورسەتەدى. تامبوۆ مەملەكەتتىك قۋىرشاق تەاترى «جۋچا» قويىلىمىن ۇسىنادى. فەستيۆال ەلوردالىق قۋىرشاق تەاترىنىڭ «ماڭگىلىك بالا بەينە» سپەكتاكلىمەن اياقتالادى. وتاندىق دراماتۋرگ روزا مۇقانوۆانىڭ ەڭبەگى 1949-1989 -جىلدارى سەمەي پوليگونىندا يادرولىق سىناقتاردان زارداپ شەككەن بالالارعا ارنالعان.
4 -شىلدە كۇنى كەشكە استانا قۋىرشاق تەاترىنىڭ زالىندا «قۇرالاي» حالىقارالىق فەستيۆالىنە قاتىسۋشىلاردى ماراپاتتاۋ جانە ونىڭ سالتاناتتى جابىلۋى وتەدى.