تۇرىك دارىگەرلەرى اقتوبەلىك بالالارعا تەگىن وتا جاسادى
اقتوبەدە العاش رەت قۇلاعى ەستىمەي قالعان بالالارعا ءساتتى وتا جاسالىپ، يمپلانتاتسيا قويىلدى. «باقىتتى بالا» جوباسى اياسىندا جاسالعان وتا كەزىندە جەرگىلىكتى دارىگەرلەر دە تاجىريبە جينادى.
«اقتوبە مەديتسينالىق ورتالىعىندا وڭىردە ءبىرىنشى رەت ەستۋ قابىلەتى تومەندەگەن بالالارعا وتا جاسالىپ، يمپلانتاتسيا قويىلدى. ءۇش وتا دا تۇركيانىڭ گازي ۋنيۆەرسيتەتىنەن كەلگەن دارىگەر رەدجەپتىڭ قاتىسۋىمەن بولدى. جوعارى تەحنولوگيالى، قىمبات وتا ەلىمىزدىڭ استانا مەن الماتى قالالارىندا عانا جاسالىپ جاتىر. ءبىزدىڭ دارىگەرلەر تاجىريبە جيناپ، الداعى ۋاقىتتا وزدەرى وپەراتسيا جاساماق. ال تۇركيالىق دارىگەر اقتوبەلىك بالالارعا تەگىن كومەك كورسەتتى»، - دەپ حابارلادى وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتى.
ايتا كەتەيىك، اقتوبە وبلىسى بويىنشا ەستۋ قابىلەتى بۇزىلعان 74 بالا بار. ولاردىڭ 10 ى وتا جاساۋ كەزەگىندە تۇر. تۇرىك دارىگەرلەرى 2-5 جاس ارالىعىنداعى ءۇش بالاعا وتا جاسادى. بالالاردىڭ ءبارى ءتورتىنشى دەڭگەيلى قۇلاق اۋرۋى دەرتىنە شالدىققان.
«تۇرىك دارىگەرلەرى بالالاردىڭ قۇلاعىنا ورناتقان يمپلانتتىڭ تۇراقتى جۇمىس ىستەۋىن قامتاماسىز ەتۋ، جوندەۋ ءۇشىن پروگرامماتور قۇرال- جابدىعىن سىيعا تارتۋ ەتتى. بۇل جەرگىلىكتى جەردە يمپلانتتاردى باقىلاپ، ونىڭ ۇزدىكسىز جۇمىس ىستەۋىن قامتاماسىز ەتۋگە مۇمكىندىك بەرەتىن اپپارات. وتا كەزىندە جەرگىلىكتى وتورينولارينگولوگتار مەن سۋردولوگتار تاجىريبە جينادى. الداعى ۋاقىتتا ولار بالالارعا كومەك كورسەتە الادى»، - دەدى باسپا ءسوز قىزمەتى.