ەكىباستۇزدا بيىكتىگى جەتى مەتر دومبىرا ورناتىلادى
08:40, 30 - ماۋسىم 2018
استانا. قازاقپارات - ۇلتتىق دومبىرا كۇنىنە وراي ەكىباستۇز قالاسىندا بيىكتىگى جەتى مەتر دومبىرا ورناتىلادى، دەپ حابارلايدى قازاقپارات pavlodarnews.kz سىلتەمە جاساپ.
ۇلتتىق اسپاپتى بالالار تەحنيكالىق مەكتەبىنىڭ پەداگوگتارى مەن ستۋدەنتتەردىڭ ەڭبەك جاساقتارى دايىنداعان. بۇل كۇنى گلينكا اتىنداعى مۋزىكا مەكتەبىنىڭ 60 دومبىراشىدان قۇرىلعان ءانسامبلى ءبىر مەزگىلدە كۇي ورىندايدى.
«شاحتەر» مادەنيەت جانە دەمالىس ساياباعىندا اعاشتان جانە قاعازدان دومبىرا دايىنداۋ بويىنشا شەبەرلىك ساباقتارى وتكىزىلەدى. كەشكە قالانىڭ شىعارماشىلىق ۇجىمدارىنىڭ قاتىسۋىمەن وتەتىن تەاترلاندىرىلعان قويىلىمداردا دومبىرانىڭ پايدا بولۋى مەن ونىڭ دامۋ تاريحى تۋرالى ايتىلادى.
بوس ۋاقىتتى قامتۋ ورتالىقتارى مەن مۋزىكا مەكتەبىنىڭ ۆوكالدىق ۇجىمدارى دومبىرادا 20-دان استام تانىمال شىعارما وينايدى.