استانادا قوسىمشا قۇتقارۋشىلار جاساعى قۇرىلدى

استانا. قازاقپارات - سۋعا شومىلۋ ماۋسىمى كەزەڭىندە استانا قالاسى توتەنشە جاعدايلار دەپارتامەنتى قالا اكىمدىگىنىڭ جۇمىسپەن قامتۋ ورتالىعىمەن بىرلەسىپ، قۇتقارۋشىلار جاساعىن قۇردى، دەپ حابارلايدى استانا قالاسى اكىمدىگىنىڭ رەسمي سايتى.

ولار 26- ماۋسىمنان باستاپ كۇن سايىن شومىلۋ كەزەڭى اياقتالعانعا دەيىن ەسىل وزەنى ارناسى بويىندا رەيدتەر جۇرگىزەدى. قازىرگى ۋاقىتتا بۇل جاساق قۇرامى 4 ادامنان تۇرادى.

وسى جىلدىڭ ماۋسىم ايىندا استانا قالاسىنىڭ سۋدا قۇتقارۋ ستانتسياسىنىڭ بازاسىندا ت ج جويۋ ءبولىمىنىڭ قىزمەتكەرلەرى جانە ءو و ا ج ق ج قۇتقارۋشىلارى قالامىزدىڭ قۇتقارۋشىلار جاساقتارى بەكەتتەرىنە نۇسقاۋلىق جۇرگىزدى. نۇسقاۋلىق بارىسىندا پاترۋلدەۋ ۋچاسكەلەرى انىقتالىپ، سونداي-اق سۋدا ءجۇزۋ قاعيدالارى مەن العاشقى مەديتسينالىق كومەك كورسەتۋ تاسىلدەرى ءتۇسىندىرىلدى.

سۋعا شومىلۋ ماۋسىمى باستالدى، سوندىقتان دا ارنايى جابدىقتالعان ورىنداردا شومىلعان دۇرىس، اتاپ ايتساق جاعاجايلاردا، باسسەيندەردە جانە قۇتقارۋشىلارمەن كۇزەتىلەتىن ورىنداردا. شومىلۋ ءۇشىن رۇقسات ەتىلەتىن سۋدىڭ تەمپەراتۋراسىنىڭ تومەنگى شەگى 18+°س، دەنى ساۋ شىنىققان ادامدارعا اۋا تەمپەراتۋرسى  22+°س. سونىمەن قاتار سۋداعى قاۋىپسىزدىك قاعيدالارىن قاتاڭ ساقتاۋ كەرەك.

قۇتقارۋشى جاساعىنىڭ بەكەتتەرى - سۋ ايدىندارىنىڭ جانىندا ورنالاسادى، ولار دەمالۋشىلارعا قاۋىپسىزدىك قاعيدالارى تۋرالى ءتۇسىندىرىپ، سۋ ايدىندارىن ارالاپ، سۋدا جازاتايىم وقيعالاردى بولدىرماۋ ءۇشىن باسقا دا پروفيلاكتيكالىق ءىس-شارالاردى جۇزەگە اسىراتىن بولادى. جاساقشىلار تانۋ جيلەتتەرىمەن، بەيدجيكتەرمەن جانە راديوستانتسيالارمەن جابدىقتالعان جانە قۇتقارۋشىلار مەن پوليتسيا قىزمەتكەرلەرىنە شۇعىل اقپاراتتى جەتكىزەتىن بولادى.