الماتىدا اشىق اسپان استىندا ساق مادەنيەتىنىڭ مۋزەيى سالىنادى

الماتى. قازاقپارات - الماتىدا تاعى ءبىر جەر ۋچاسكەسى مەملەكەت مەنشىگىنە قايتارىلادى، دەپ حابارلايدى قازاقپارات ءتىلشىسى.

الماتى اكىمدىگى مەن ەكىنشى دەڭگەيلى ءبىر بانك روزىباكيەۆ- شتراۋس- ەسقارايەۆ- رادوستوۆەتس كوشەلەرى قيىلىسىنداعى 2,7 گەكتار جەر ۋچاسكەسىن مەملەكەت مەنشىگىنە قايتارۋ جونىندەگى كەلىسىمگە قول جەتكىزدى.

«رۋحاني جاڭعىرۋ» مەملەكەتتىك باعدارلاماسى اياسىندا ساق قورعانى ورنالاسقان اۋماقتا جاڭا مادەني ورتالىق قۇرۋ جوسپارلانعان. اشىق اسپان استىنداعى مۋزەي كەلۋشىلەردى قازاقستان جەرىن مەكەندەگەن ەرتەدەگى كوشپەندىلەردىڭ باي تاريحىمەن تانىستىرىپ، قالانىڭ جاڭا تۋريستىك كورنەكى ورنىنا اينالادى.

جوبا بارىسىندا ءبىزدىڭ ەرامىزعا دەيىنگى V عاسىردا پايدا بولعان جارتىلاي قيراعان قورعاندار، تاس قورشاۋلار، ونىڭ جوعارى جاعىنداعى ساقينالاردى قالپىنا كەلتىرۋ جوسپارلانعان.

ساۋلەت ەسكەرتكىشىنىڭ ءىش جاعىندا ارتەفاكتىلار ساقتالعان بولمەلەر، ەرتەدەگى كوشپەندىلەردىڭ تاريحى مەن مادەنيەتىن پاش ەتەتىن گەوگرافيالىق كينو كورسەتەتىن اۋديوۆيزۋالدى زالدار بولادى.

ەسكە سالساق، بۇعان دەيىن الماتى اكىمدىگىندە ەل پرەزيدەنتىنىڭ «رۋحاني جاڭعىرۋ» باعدارلاماسىن جۇزەگە اسىرۋعا وراي كەڭەس ءوتىپ، وندا روزىباكييەۆ كوشەسى بويىنداعى «مەگا» ساۋدا ورتالىعى ماڭىنان تابىلعان ساق ەسكەرتكىشىنىڭ ورنىنا اشىق اسپان استىنداعى مۋزەي سالۋ جونىندە ۇسىنىس ايتىلعان ەدى.

الماتى اكىمى باۋىرجان بايبەك بۇل ۇسىنىستى قولداپ، جەردى مەملەكەت مەنشىگىنە قايتارۋدىڭ مەحانيزمىن ويلاستىرۋدى تاپسىرعان بولاتىن.

«مەن جەردى مەنشىكتەگەن جاندار ءوز تاريحىمىزدى بىلەدى جانە قۇرمەتتەيدى دەپ ويلايمىن. ءبىز كەيدە تاريحىمىزدىڭ جويىلىپ بارا جاتقانىن دا بايقايمىز، ال بۇل ورنى تولماس رۋحاني، مادەني جانە ەكونوميكالىق زيان شەكتىرەدى. ارينە، اسفالت توسەپ، بىردەڭەنى سالۋعا بولادى، ءبىراق اكىمدىككە قايتارسا، پايدا زور بولاتىنى انىق»، - دەگەن ەدى باۋىرجان بايبەك.

ايتا كەتۋ كەرەك، كەشە «TURKUAZ GROUP OF COMPANIES» كومپانياسى ءوز ەركىمەن «يۋجنىي» ساياباعىندا تۇرعىن ءۇي كەشەنىن سالاتىن جەر ۋچاسكەسىن مەملەكەت پايداسىنا قايتارعان ەدى.

بۇدان بۇرىن اكىمدىكتىڭ قاۋلىسىمەن قازاقستاننىڭ «اتاكەنت» ىسكەرلىك ورتالىعىمەن 23 گەكتار جەردى ۋاقىتشا جالعا بەرۋ كەلىسىمىنىڭ كۇشى جويىلدى. كەيىن باسقارۋشى كومپانيا جەكە مەنشىكتەگى تاعى دا سەگىز گەكتار جەردى تەگىن قايتارۋ جونىندە مىندەتتەمە قابىلدادى.

الماتىدا وسى اپتا ىشىندە قالانىڭ كوممۋنالدىق مەنشىگىنە قايتارىلعان باۋم باعىن اباتتاندىرۋ باستالدى. جۇرگىزىلگەن مونيتورينگ بارىسىندا 2,5 گەكتار جەردى ءوز بەتتەرىنشە باسىپ العاندار انىقتالدى. مەگاپوليس باسشىسى زاڭعا سۇيەنە وتىرىپ، باسىپ العان باۋدى قايتارۋدى جانە جاسىلداندىرۋ جۇرگىزۋدى تاپسىردى.

بۇلاردان وزگە، الماتى اكىمدىگى قالا يپپودرومى مەن «سايران» اۆتوۆوكزالىن تاريحي- مادەني مۇرانىڭ الدىن- الا جاسالعان تىزىمىنە ەنگىزدى. وسى ساتتەن باستاپ عيماراتتىڭ سىرتقى كەلبەتىن وزگەرتۋگە، ءىشىن قايتا جوسپارلاۋعا، ماقساتتى پايدالانىلۋىن اۋىستىرۋعا، قورعالاتىن ايماقتى بۇزۋعا تىيىم سالىنادى. عيماراتتى جاڭارتۋ جانە جوندەۋ جۇمىستارىنىڭ بارلىعى وكىلەتتى ورگاننىڭ كەلىسىمىمەن عانا جاسالادى.