كوپشىلىك ەر باسىمەن قىزداردىڭ بەت الپەتىن بوياپ جۇرگەن ازاماتتى قاتاڭ سىنعا الىپ، ونىڭ قىزمەتىنە جۇگىنگەنى ءۇشىن ءسادۋاقاسوۆانىڭ وزىنە دە جاعىمسىز پىكىرلەردى جاۋدىرعان، دەپ جازادى Stan.kz اقپاراتتىق اگەنتتىگىنىڭ ءتىلشىسى.
الايدا سوعان قاراماستان، ءمادينا ءالى كۇنگە دەيىن كيىمى مەن بەت الپەتىن ەر ازاماتتارعا سەنىپ تاپسىرادى ەكەن. ونىڭ سەبەبىن ءانشى 7-ارنانىڭ «ءوز ويىم» باعدارلاماسىندا ءتۇسىندىردى.
«مەنىڭ ويىمشا، ايەل ادام، ەر ادام دەپ بولىنبەيدى. ءوز مامانىنىڭ يەسى، كاسىبي ۆيزاجيست بولسا، وندا تۇرعان نە بار؟ ! ەر ادامداردان ۆلاديمير، قىزداردان ساندي ءوز ءىسىنىڭ بىلىكتى شەبەرى. سوندىقتان مەن ءبولىپ- جارمايمىن. سول سياقتى كيىم تىگەتىن ستيليستەر بار. مىسالى، نايل ەر ادام بولسا دا، قىز بالانىڭ دەنە ءبىتىمىن، كويلەكتىڭ، ءساننىڭ نە ەكەنىن وتە جاقسى بىلەدى. ۆوۆا (ەل اراسىندا اتاماس ەسىمىمەن تانىمال) ءوزى دە كورىكتى، سۇلۋ جىگىت.
نەلىكتەن ەلدىڭ سىناپ جاتقانىن تۇسىنبەدىم. ويتكەنى ەر ادام بولسا دا، ايەل ادام بولسا دا، ءوز- وزىنە قاراۋ كەرەك. ال ەندى ستيليست، ۆيزاجيست - ونىڭ ماماندىعى»، - دەيدى ءسادۋاقاسوۆا.
بۇل ورايدا باعدارلاماعا قاتىسقان ءانشى بەيبىت قورعان بويانىپ، سىلانىپ جۇرەتىن ارىپتەستەرىن قۇپتامايتىنىن ايتتى. دەسە دە، ول ونەر ادامى بولعان سوڭ، سىرتقى كەلبەتىنە ءمان بەرىپ جۇرگەن دۇرىس، دەگەن پىكىردە.
«ءسان سالونىنا بارمايتىن اداممىن. ءانشى بولعاننان كەيىن، وزىڭە قاراۋ كەرەك دەپ ويلايمىن. تازالىق جاعىنا ءمان بەرىپ، شاشىڭدى دۇرىستاپ ءجۇرۋ كەرەك. ءبىراق ءانشى بولماسام، وندايعا اسا بارماس ەدىم. مانيكيۋر، پەديكيۋر جاساتپايمىن»، - دەگەن ول ەركەكتىڭ ەركەك بولىپ قالۋى كەرەكتىگىن مالىمدەدى.