استانادا «كوشپەندىلەر الەمى» حالىقارالىق فەستيۆالى وتەدى
فەستيۆالدىڭ تۇجىرىمداماسى تۇركى حالىقتارىنىڭ ۇلكەن قۇرىلتايى مودەلىنە نەگىزدەلگەن. ءساتتى دەپ تانىلعان شارا ۆەنگريادا 2008-جىلدان باستاپ وتكىزىلىپ كەلەدى.
«كوشپەندىلەر الەمى» حالىقارالىق فەستيۆالى جەتى اۋىلدان تۇرادى:
«اق مەرگەن» اۋىلى كوشپەندىلەردەن كەلە جاتقان كونە قارۋ ساداقپەن اتۋدىڭ شەبەرلەرىن انىقتايدى؛
«شابىت» اۋىلى تۇركى حالىقتارىنىڭ ەتنيكالىق مۋزىكاسىمەن تانىستىرادى؛
«تايبۋرىل» اۋىلى «كوكپار تارتۋ»، «اۋدارىسپاق»، «قىز قۋۋ»، «اساۋ» جانە تاعى باسقا ۇلتتىق ويىنداردى پاش ەتپەك؛
«كەرۋەن سارايى» اۋىلى مەيماندارعا كوشپەندىلەردىڭ اس ازىرلەۋ ءادىسى مەن ءمازىرىن ۇسىنباق؛
«اق ساقا» اۋىلى «قازاق كۇرەسى»، «ارقان تارتۋ»، «اسىق اتۋ» جانە تاعى باسقا كوشپەندىلەردىڭ ءداستۇرلى ويىندارىن كورسەتىپ، رۋحى مەن بولمىس-ءبىتىمى بەرىك باتىرلار ءوز ونەرىن ورتاعا سالادى؛
«باتىر» اۋىلى دالا باتىرلارىنىڭ ەجەلگى شايقاستارىنىڭ قىر-سىرىمەن تانىستىرادى؛
«شەبەر» اۋىلى قولونەر شەبەرلەرىنىڭ بۇيىمدارىن پاش ەتۋمەن قاتار، ونى جاساۋدىڭ سىرىمەن بولىسەدى.
قازاقستان استاناسىنىڭ 20 جىلدىعىنا ورايلاستىرىلعان فەستيۆال اياسىندا ورتا عاسىرلارداعى جاۋجۇرەك باتىرلاردىڭ بەينەسى قايتا «تىرىلەدى»، مايدان دالاسىنداعى ايقاس كورسەتىلىپ، كوشپەندىلەر مادەنيەتى پاش ەتىلەدى.
ودان بولەك، امازونكالاردىڭ ونەرى كورەرمەندەر ەسىندە قالار قىزىقتى قويىلىم بولماق دەيدى ۇيىمداستىرۋشىلار.
حالىقارالىق شاراعا قازاقستاننان وزگە ۆەنگريا، بولگاريا، تۇركيا، ۋكراينا، باشقۇرتستان، ياكۋتيا، قىرعىزستان كوماندالارى قاتىسادى.
«ءبىز بۇل فەستيۆال ارقىلى كوشپەندىلەردىڭ ءداستۇرىن جاڭعىرتىپ قانا قويماي، حالىقارالىق ستاتۋس الاتىن برەندكە اينالدىرعىمىز كەلەدى. فەستيۆالدىڭ ەرەكشەلىگى - بىرنەشە جانردا بولۋى. ءوزىمىزدىڭ ونەرپازداردان بولەك 100 دەن اسا شەتەلدىك كوشپەندىلەر مادەنيەتىن جاڭعىرتۋشىلار قاتىسادى. ايتۋلى شارادا جالپى سانى 5 مىڭنان اسا قوناق بولادى دەپ كۇتۋدەمىز»، - دەدى «Kazakh Tourism» ۇ ك ا ق باسقارما ءتوراعاسىنىڭ ورىنباسارى تيمۋر دۇيسەنعاليەۆ.
فەستيۆالدى ق ر مادەنيەت جانە سپورت مينيسترلىگىنىڭ تۋريزم يندۋسترياسى كوميتەتىنىڭ تاپسىرىسىمەن جانە استانا قالاسى اكىمدىگىنىڭ قولداۋىمەن «Kazakh Tourism» ۇ ك ا ق ۇيىمداستىرۋدا.
ەتنوفەستيۆال 30- ماۋسىم مەن 1- شىلدە ارالىعىندا «قازانات» يپپودرومىنىڭ اۋماعىنداعى «ەتنواۋىل» ۇلتتىق- مادەني كەشەنى جانىنداعى الاڭدا ۇيىمداستىرىلادى. قالا بويىنشا ارنايى كولىك قاراستىرىلعان.