ايەلدەر ءۇشىن الەمدەگى ەڭ قاۋىپتى ەلدەر

  استانا. قازاقپارات - ايەلدەر ءۇشىن الەمدەگى ەڭ قاۋىپتى ەلدىڭ تىزىمىندە ءۇندىستان كوش باستاپ تۇر.

بۇل تۋرالى Reuters اگەنتتىگى Thomson Reuters قورىنىڭ رەيتينگىسىنە سىلتەمە جاساپ، Stan.kz اقپارتتىق اگەنتتىگى حابارلايدى.

ءۇندىستان بىرنەشە سەبەپتەرگە بايلانىستى الەمدەگى ەڭ قاۋىپتى ەل دەپ تانىلدى. ەلدە سەكسۋالدىق زورلىق- زومبىلىق پەن قۋدالاۋ، ادام ساۋداسى، سونىڭ ىشىندە ءماجبۇرلى ەڭبەك، جىنىستىق جانە تۇرمىستىق قۇلدىق بەلەڭ العان.

سونداي- اق، قاۋىپ جاعىنان اۋعانستان بۇل تىزىمدە ەكىنشى ورىندا تۇر. ساراپشىلاردىڭ پىكىرىنشە، تاليبان قۇلاعاننان كەيىن 17 جىل وتكەن سوڭ ايەلدەر ەلەۋلى قيىندىقتارعا تاپ بولا باستادى. اۋعانستان سەكسۋالدى ەمەس زورلىق- زومبىلىق، دەنساۋلىق ساقتاۋعا جانە ەكونوميكالىق رەسۋرستارعا قولجەتىمدىلىك جاعىنان ايەلدەر ءۇشىن قاۋىپتى.

ال، سيريا تۋرالى ايتپاساق تا بەلگىلى. ەلدە 7 جىل ازاماتتىق سوعىس بولعاننان كەيىن، ءبىرىنشى كەزەكتە ايەلدەر ءۇشىن قاۋىپتى سانالادى. وندا جىنىستىق ەمەس زورلىق- زومبىلىق قاۋپى جوعارى، سونىڭ ىشىندە جانجالعا جانە وتباسىنداعى زورلىق- زومبىلىققا قاتىستى.

ءتورتىنشى ورىندا سومالي. بۇل دەنساۋلىق ساقتاۋعا قولجەتىمدىلىك بويىنشا ايەلدەر ءۇشىن ءۇشىنشى ەڭ قاۋىپتى ەل. ءسوماليدىڭ مادەني داستۇرلەرى ايەلدەرگە قاتال قاراۋعا جول بەرەدى. سونداي- اق، مۇندا ايەلدەردىڭ ەكونوميكالىق رەسۋرستارعا قول جەتىمدىلىگى كۇردەلەنە تۇسكەن.

بەسىنشى تىزىمدە ساۋد ارابياسى. پاتشالىقتا ايەلدەر ەكونوميكالىق رەسۋرستارعا قيىندىقپەن قول جەتكىزەدى، وعان قوسا ەلدە ايەلدەردى كەمسىتۋشىلىك جوعارى. مۇندا ايەلدەر ءدىني جانە مادەني داستۇرلەرگە بايلانىستى قيىندىققا تاپ بولىپ جاتادى.

بۇدان كەيىن ايەلدەر ءۇشىن قاۋىپتى ەل ءتىزىمىن پاكىستان، كونگو، يەمەن، نيگەريا جانە ا ق ش جالعىستىرادى. امەريكا قۇراما شتاتتارى ايەلدەر زورلىق- زومبىلىققا كوپ ۇشىرايتىن ەل رەتىندە ەرەكشەلەنەدى.