قىتاي قازاقستانعا ءۇش ميلليون دوللار تۇراتىن «التىن كوپىرىن» سىيلاماق

 استانا. قازاقپارات - قىتاي ساۋلەتشىسى شۋن-لي استانادا «التىن كوپىر» اتتى مونۋمەنت سالماق.

مونۋمەنت دەمەۋشىلەردىڭ ەسەبىنەن سالىنباق. ونىڭ قۇنى 3 ميلليون دوللاردى قۇراپ وتىر، دەپ حابارلايدى ەلوردا ينفو.

«بۇگىنگى كۇنى «التىن كوپىردىڭ» يدەياسى - ول مىڭجىلدىق كوپىر. شىن مانىندە ونداي كوپىر بار. 1000 جىل بۇرىن سالىنعان. 2017 -جىلى بەيجىڭدە «ءبىر بەلدەۋ - ءبىر جول» فورۋمى ءوتتى. سول فورۋمنىڭ قاتىسۋشىلارى جىبەك جولى ەلدەرىنىڭ سيمۆولى التىن كوپىر بولادى دەگەن شەشىم قابىلدادى.

بۇگىنگى كۇنى ساۋلەتشى بىزبەن دە، اكىمدىكپەن دە بىرلەسىپ جۇمىس ىستەيدى. بۇل جوبا الداعى اپتادا استانادا وتەتىن فورۋمدا تانىستىرىلادى. ماكەتى فورۋم وتەتىن جەرگە ورناتىلادى. ال ساۋلەت تۋىندىسى ءبىر جىل ىشىندە سۋلى- جاسىل بۋلۆاردىڭ جالعاسى رەتىندە «حان شاتىر» و س و ارعى جاعىنا ورناتىلادى. قالا تۇرعىندارى مەن قوناقتارى ءۇشىن جاقسى جەر. كەلەسى جىلى وسى ۋاقىتتا مونۋمەنتتى كورەمىز دەپ ۇمىتتەنەمىز»، - دەدى G-Global حالىقارالىق حاتشىلىعى جەتەكشىسىنىڭ ورىنباسارى مۇرات قارىمساقوۆ ورتالىق كوممۋنيكاتسيالار قىزمەتىندە وتكەن بريفينگتە.

ساۋلەتتىك مونۋمەنتتە جىبەك جولى ەلدەرى سانالاتىن 50 مەملەكەتتى بەينەلەنەدى. كوپىر التىن تۇستەس بولماق.