جاس روبوتوتەحنيكتەردىڭ جارىسى ەرەكشە كرەاتيۆتى باستالدى. اشىلۋ سالتاناتىندا ءداستۇرلى قىزىل لەنتانى ەكى درون توبەدەن ۇشىرىپ اكەلدى.
جارىس ءتورت ساناتتان تۇردى: «بازالىق»، «كرەاتيۆتى»، «روبوتتار فۋتبولى» جانە «Smart city».
«WRO 2018» تاقىرىبى «استىڭ ماڭىزى» دەپ اتالدى. سوندىقتان جوبالاردىڭ باسىم بولىگى تاعامدارمەن بايلانىستى بولدى. ورگانيكالىق سۋ كاپسۋلالارىن جاسايتىن روبوت، تاعامعا ارنالعان 3D پرينتەرلەر، جارما بوتقاسىن دايىندايتىن روبوت، اقىلدى ازىق-تۇلىك دۇكەندەرى، روبوتتىق ساڭىراۋقۇلاق فەرماسى، روبوت باعباندار ت. ب.
ودان بولەك، اشتىققا قارسى جاھاندىق كۇرەسكە ارنالعان ءبىرقاتار قىزىقتى جوبالار ۇسىنىلدى. سونداي ەرەكشە جۇمىستاردىڭ ءبىرى تالدىقورعان قالاسىنان كەلگەن جاس ونەرتاپقىشتار دانيل فيليمونوۆ پەن ابدىراسۋل راسۋلوۆتىڭ «Space garden» نەمەسە «عارىشتاعى جىلىجاي» روبوتى بولدى.
قۇرىلعى ارقىلى ۇزاق عارىشتىق ەكسپەديتسيالارعا ارنالعان كەڭىستىكتە وسىمدىكتەردى اۆتوماتتى وسىرۋگە بولادى. روبوت ستانتسيادا ۇشىپ ءجۇرىپ ەگىن ەگۋمەن، ونى كۇتىپ باپتاۋمەن جانە ازىقتى جيناپ الۋمەن اينالىسادى.
«جارىسقا قاتىسقان ءاربىر جاس ونەرتاپقىشتىڭ ەڭبەگى ايتۋعا تۇرارلىق جانە ءبىر-ءبىرىن قايتالامايدى. بارلىق جەڭىمپازدار جاتتىعۋ كەزدەسۋلەرىنە قاتىسادى جانە سونىڭ نەگىزىندە تايلاندتا وتەتىن دۇنيەجۇزىلىك روبوتتار وليمپياداسىندا ەل نامىسىن قورعايتىن ۇلتتىق كوماندا قۇرىلادى»، - دەدى «نازاربايەۆ زياتكەرلىك مەكتەپتەرى» د ب ب ۇ ءتورايىمى كۇلاش ءشامشيدينوۆا.