قازاقستانعا عارىشكەرلەر كەلدى

استانا. قازاقپارات - عارىشكەرلەر ق ر مادەنيەت جانە سپورت ءمينيسترى ا. مۇحامەدي ۇلىنىڭ ارنايى شاقىرتۋىمەن كەلدى، دەپ حابارلايدى قازاقپارات ءتىلشىسى.

قازاقستانعا ارنايى شاقىرتۋمەن كەلگەن ارداگەر عارىشكەرلەردىڭ قاتارىندا كەڭەس وداعىنىڭ باتىرى، ۇشقىش-عارىشكەر اناتولي ارتسەبارسكي، ر ف باتىرى، قازاقستاننىڭ حالىق قاھارمانى، رەسەي جانە قازاقستاننىڭ ۇشقىش- عارىشكەرى يۋري مالەنچەنكو جانە ر ف باتىرى، ر ف ۇشقىش- عارىشكەرى يۋري باتۋرين بار.

شارا ەلباسىنىڭ الاكولدە تۋريزمدى دامىتۋ بويىنشا تاپسىرماسىنا سايكەس ىشكى جانە رەسەيلىك تۋريستەردى تارتۋ ماقساتىندا ۇيىمداستىرىلۋدا. ارنايى شاقىرىلعان قوناقتارعا ءۇش كۇن بويى الاكولدىڭ كۋرورتتى ايماقتارى مەن ساۋىقتىرۋ ورتالىقتارى كورسەتىلەدى.

«كەڭەس وداعى كەزىندە الاكول كولىنىڭ شيپالى سۋى عارىشكەرلەر ءۇشىن ۇشۋدان كەيىن مەديتسينالىق ساۋىقتىرۋ ماقساتىندا پايدالانىلعانى بارشامىزعا بەلگىلى»، - دەدى ارىستانبەك مۇحامەدي ۇلى.

عارىشكەرلەردىڭ ايتۋىنشا، كەزىندە الاكول كۋرورت-شيپاجايىندا ۇشۋدان كەيىنگى قايتا بەيىمدەلۋدىڭ سوڭعى پروتسەسى جۇرگىزىلگەن. ياعني تولىق قايتا قالىپتاسىپ، كەلەسى ۇشۋعا بەرىلەتىن جولداما وسى جەردە شەشىلەتىن بولعان.

شارا «قازاق تۋريزم» ا ق ۇلتتىق كومپانياسىنىڭ ۇيىمداستىرۋىمەن جانە قازاقستان حالىق قاھارمانى، ق ر اۆياتسياسىنىڭ گەنەرال-لەيتەنانتى تالعات مۇسابايەۆتىڭ قولداۋ ءبىلدىرۋىنىڭ ارقاسىندا ۇيىمداستىرىلدى.