قىتاي جانە يتاليا قارجىگەرلەرىنە قوقىس وڭدەۋ زاۋىتىن اقتوبەدە سالۋ ۇسىنىلدى

اقتوبە. قازاقپارات - اقتوبە اكىمدىگى قىتاي مەن يتاليا ينۆەستورلارىنا قوقىس وڭدەۋ زاۋىتىن سالۋدى ۇسىندى، دەپ حابارلايدى قازاقپارات ءتىلشىسى.

اقتوبە قالاسىنداعى قوقىس پوليگونى 10 جىلدان استام ۋاقىتتان بەرى پايدالانىلىپ كەلەدى. ءقازىر اۋماعى 60 گەكتار بولاتىن پوليگوننىڭ باسىم بولىگى تولىپ قالعان. تاياۋدا ءورت شىعىپ، ونى سوندىرۋگە ەكى كۇن بويى 30-دان استام تەحنيكا جۇمىلدىرىلدى. اقتوبە وبلىسى اكىمىنىڭ ورىنباسارى قايرات بەكەنوۆتىڭ ايتۋىنشا، الداعى ۋاقىتتا پوليگون اۋماعىندا كۇزەت كۇشەيىپ، بوگدە ادامنىڭ تەرريتورياعا كىرىپ كەتپەۋى قاداعالاناتىن بولادى.

«اقتوبە قالاسىنىڭ قوقىس پوليگونى 2023 -جىلعا دەيىن جارامدى. الداعى ۋاقىتتا پوليگونعا قوقىس وڭدەۋ زاۋىتىن سالۋ جوسپاردا بار. قالادان شىققان قوقىس تەك سۇرىپتالسا، ەندى قىتاي مەن يتاليا ينۆەستورلارىنىڭ ۇسىنىسىن قاراپ جاتىرمىز. ولار قالدىقتى تولىق وڭدەۋ جوباسىن ۇسىندى. ءتىپتى، ەلەكتر قۋاتىن وندىرۋگە بولادى ەكەن»، - دەيدى اقتوبە قالالىق تۇرعىن ءۇي- كوممۋنالدىق شارۋاشىلىق ءبولىمى باسشىسىنىڭ مىندەتىن اتقارۋشى ىبىراي كۇزبايەۆ.

ايتا كەتەيىك، جەرگىلىكتى اكىمدىك ينۆەستورلارعا قوقىستى شىعارۋ جوباسىن قوسا ۇسىنعان. بۇعان دەيىن حابارلاعانىمىزداي، قالا اۋماعى 10 تەرريتورياعا ءبولىنىپ، ءارقايسىسىنا جاڭا كومپانيا بەكىتىلگەنىمەن، تۇرمىستىق قاتتى قالدىقتى شىعارۋ ماسەلەسى شەشىمىن تاپپادى.