بالالار قۇقىقتارى جونىندەگى جاڭا ۋاكىل ايتپايەۆا: اكە- انا كودەكسىن ەنگىزۋ كەرەك
«ارينە، الدىمەن ءبارىن قاراپ شىعۋ قاجەت. وسى جۇمىستىڭ نەگىزىندە الداعى جوسپارلار دا جاسالادى. ءسوز جوق، بالالار قۇقىقتارىن قورعاۋ ماسەلەسىنە باسا نازار اۋدارىلادى. مەن ءوزى ءبىر كۇننىڭ ىشىندە ميلليونداعان بالانىڭ اناسى بولىپ شىقتىم. بۇل - ۇلكەن جاۋاپكەرشىلىك، ۇلكەن سەنىم. ال جاۋاپكەرشىلىك بار جەردە جۇمىس تا كوپ. مەن ءوزىم ءبىر نارسەنى الدىن الا ايتپايمىن، ناقتى فاكتىمەن سويلەگەندى جاقسى كورەمىن»، - دەدى س. ايتپايەۆا جۋرناليستەرگە بەرگەن سۇحباتىندا.
ونىڭ ايتۋىنشا، بالالار قۇقىقتارىن قورعاۋ ءۇشىن الدىمەن انا مەن اكە ينستيتۋتىن كۇشەيتۋ كەرەك. مۇعالىمدەر دە بالانىڭ كوڭىلىنە باسا نازار اۋدارۋى قاجەت. «بىرىنشىدەن، اتا- انالار ءوز بالاسىنىڭ كوڭىلىن ءتۇسىنۋى كەرەك. ونى قانداي ماسەلەلەر مازالاپ ءجۇر؟ كوڭىلى نەگە الاڭدايدى؟ سونىڭ ءبارىن ءبىلۋى ءتيىس. ەكىنشىدەن، مۇعالىمدەر دە بالانىڭ كوڭىلىن باقىلۋى قاجەت. ءالى ەسىمدە، ءبىزدىڭ كەزىمىزدە مۇعالىمدەر انامىز سياقتى بولدى. وتباسىنىڭ جاعدايىن، بالانىڭ قانداي ماسەلەگە الاڭداپ جۇرگەنىن - ءبارىن- ءبارىن ءبىلىپ وتىراتىن. مەنىڭشە، قازىرگى سىنىپ ساعاتتارىن مۇعالىم مەن بالا اراسىنداعى بايلانىستى ورناتۋعا ارناۋ قاجەت. نەگىزى، مۇعالىمگە، اناعا، اكەگە دەگەن سەنىم بولسا، بالانىڭ ءوز- وزىنە دەگەن سەنىمى دە مىقتى بولادى. ءدال وسى سەنىمدى كۇشەيتۋىمىز كەرەك. اكە كودەكسى، انا كودەكسى سياقتى ءبىر قۇجات بولۋ كەرەك سياقتى. سوندا ناقتى اقىل- كەڭەستەردى كورسەتۋگە بولادى»، - دەپ اتاپ كورسەتتى س. ايتپايەۆا.
ايتا كەتەيىك، كۇنى كەشە ق ر پارلامەنت سەناتىنىڭ دەپۋتاتى ساۋلە ايتپايەۆا ق ر بالا قۇقىقتارى جونىندەگى ۋاكىل قىزمەتىنە تاعايىندادى.
ساۋلە مۇحانبەديان قىزى - قازاقستاننىڭ تۇڭعىش ايەل گەنەرالى. وسىناۋ جوعارى شەندى 2013 -جىلى وتان قورعاۋشىلار كۇنى پرەزيدەنت نۇرسۇلتان نازاربايەۆتىڭ ءوزى تابىس ەتكەن بولاتىن. ساۋلە مۇحانبەديان قىزى 1960 -جىلدىڭ 22 مامىرىندا تورعاي وبلىسى جاقسى كەنتىندە ءومىر ەسىگىن اشقان. ونىڭ ومىرلىك جولى قازاقستاندىق ايەلدىڭ ەڭ بيىك ماقساتتى باعىندىرا الاتىنىن، دارىن مەن ەڭبەك سۇيگىشتىك تابىسقا جەتۋدىڭ باستى شارتى بولاتىنىن دالەلدەيدى.
سۆەردلوۆ زاڭگەرلىك ينستيتۋتىن بىتىرگەننەن كەيىن ساۋلە مۇحانبەديان قىزى پروكۋراتۋرا سالاسىنىڭ بارلىق باسپالداعىن باسىپ وتكەن. ونىڭ ەڭبەك جولى اقمولا وبلىسى سەلينوگراد قالاسى لەنين اۋدانىنىڭ پروكۋراتۋراسىندا باستالعان. ودان كەيىن ول قازاقستان رەسپۋبليكاسى باس پروكۋراتۋراسىنىڭ جانىنداعى قۇقىقتىق ستاتيستيكا جانە اقپارات ورتالىعىندا قىزمەت ەتەدى. 2003 -جىلدان باستاپ قازاقستان رەسپۋبليكاسى باس پروكۋراتۋراسىنىڭ ارنايى ەسەپ جانە قۇقىقتىق ستاتيستيكا بويىنشا كوميتەت ءتوراعاسىنىڭ ءبىرىنشى ورىنباسارلىعىنا تاعايىندالادى. 2017 -جىلدىڭ شىلدەسىنەن - ق ر پارلامەنتى سەناتىنىڭ دەپۋتاتى، سەناتىنىڭ كونستيتۋتسيالىق زاڭدىلىق، سوت جۇيەسى جانە قۇقىق قورعاۋ ورگاندارى كوميتەتىنىڭ مۇشەسى.
اۆتور: ارمان اسقاروۆ