وڭتۇستىك كورەيا پرەزيدەنتى مۋن چجە ين ەكى ەل قول جەتكىزگەن كەلىسسوزدى «ۇلى جەڭىس» دەپ باعالاپ، قارىم- قاتىناستى نىعايتۋ ماقساتىندا ءوز تاراپىنان قانداي كومەك كەرەك بولسا دا ايانباي اتسالىساتىنى تۋرالى مالىمدەدى. وسى تاريحي ساتكە بايلانىستى بريفينگ ۇيىمداستىرىلىپ، پرەزيدەنت وكىلى ءسوز سويلەدى.
كيم يۋ كيوم، وڭتۇستىك كورەيا پرەزيدەنتىنىڭ وكىلى:
- مەن سولتۇستىك كورەيا مەن ا ق ش پرەزيدەنتتەرىنىڭ اراسىنداعى تاريحي سامميتتىڭ ءساتتى وتكەنى ءۇشىن قۋانىشتىمىن. ەكى ەلدىڭ مامىلەگە كەلىپ، كەلىسسوز جۇرگىزۋىمەن قۇتتىقتايمىن. كيم چەن ىن مەن دونالد ترامپ باتىل قادام جاسادى دەپ ەسەپتەيمىن.
ال قىتايدىڭ سىرتقى ىستەر ءمينيسترى بۇل ءساتتى «جاھان احۋالىنا اسەر ەتەتىن ماڭىزدى پروگرەسس» دەپ باعالادى. «كورەي تۇبەگىندەگى يادرولىق قارۋسىزدانۋ ماسەلەسى بويىنشا قىتايدىڭ ءرولى ەرەكشە جانە بۇل ماسەلە اسپاناستى ەلىنىڭ ءجىتى نازارىندا بولاتىنىنا ەشكىم كۇمان كەلتىرمەيدى» دەدى ۆان ي.
ۆان ي، ق ح ر سىرتقى ىستەر ءمينيسترى:
- امەريكا قۇراما شتاتتارى مەن سولتۇستىك كورەيانىڭ ءبىر- بىرىمەن ءتىل تابىسا الماي، ءتىپتى جاۋلاسىپ كەلە جاتقانىنا جارتى عاسىرعا جۋىق ۋاقىت ءوتتى. ال ءبارىمىز كۋا بولعان سامميت جاڭا تاريح بەتتەرىندە جازىلادى. قىتاي مەملەكەتى بۇل كەلىسسوزدى تولىعىمەن قولدايدى. سونىمەن قاتار يادرولىق قارۋسىزداندىرۋدى جۇزەگە اسىرۋ ءۇشىن بۇل قۇجاتتان بولەك جاڭا مەحانيزم قالىپتاستىرۋ كەرەك دەپ ەسەپتەيمىن.
جاپونيا تاراپى دا بۇل كەلىسسوزدىڭ ماڭىزدىلىعىنا توقتالدى. ابە بۇل جوبانىڭ كورەي تۇبەگىندەگى ماسەلەلەردى تۇبەگەيلى شەشۋگە ىقپال ەتەرىن ايتتى.
سيندزو ابە، جاپونيا پرەمەر- ءمينيسترى:
- بۇل تاريحي سامميتتە قابىلدانعان قۇجاتتان كۇتەرىمىز كوپ. ەكى ەل باسشىلارىنىڭ مۇنداي قادامى جارقىن بولاشاققا جول اشادى دەپ ۇمىتتەنەمىن. سولتۇستىك كورەيانىڭ جاقسى ءومىر سۇرۋگە قاۋقارى جەتكىلىكتى. تەك دۇرىس جول تاڭداۋى كەرەك.
ەۋروپالىق وداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى فەدەريكا موگەريني ديپلوماتيالىق جولمەن كەز كەلگەن سوعىستىڭ الدىن الۋعا بولاتىنىن جانە كورەي تۇبەگىندەگى ىنتىماقتاستى ورناتۋدا ساياسي كەلىسسوزدىڭ وتكەنى جاقسىلىقتىڭ نىشانى ەكەنىن ءدوپ باسىپ ايتتى. قاراپايىم حالىقتىڭ قۋانىشىندا دا شەك جوق.
www.24.kz