تاۋ شىڭىندا وتتەگىسىز ۇيىقتاۋعا تۋرا كەلدى - ماقسۇت جۇمايەۆ

الماتى. قازاقپارات - بەلگىلى قازاقستاندىق الپينيست ماقسۇت جۇمايەۆ الەمنىڭ ەڭ بيىك نۇكتەسى ەۆەرەست شىڭىنا ەڭ قيىن جول ارقىلى قالاي شىققانى تۋرالى ايتىپ بەردى، دەپ حابارلايدى قازاقپارات ءتىلشىسى.

بۇگىن بەلگىلى سپورتشى الماتىلىقتارمەن كەزدەسۋى بارىسىندا ومىرىندەگى ەڭ قيىن مارشرۋت تۋرالى شىتىرمان وقيعالارىمەن ءبولىستى.

جۇمايەۆتىڭ توبىنا جولدىڭ جارتىسىنا دەيىن وتتەگىسىز جۇرۋگە تۋرا كەلگەن.

«وتتەگىمەن نەمەسە وتتەگىسىز ءجۇرۋدىڭ ايىرماشىلىعى قانداي ەكەنىن ايتاتىن بولسام، وتتەگىسىز 3-4 قادام جۇرەسىڭ دە دەمالاسىڭ.. .وتتەگى باللونىنا ارقا سۇيەۋگە بولمايدى. ءتورتىنشى لاگەرگە كەلگەندە جىگىتتەرگە وتتەگىسىز ۇيىقتايمىز دەدىم. وتتەگى - بارلىق پروبلەمانى شەشپەيدى. ءيا، ارى كەتسە، 15-20 قادام ۇزارسىز. ءبىراق بۇل قانات ءبىتىپ ۇشىپ كەتەسىڭ دەگەندى بىلدىرمەيدى»، - دەدى ول.

ونىڭ ايتۋىنشا، وتتەگىمەن شىعاتىن سپورتشى وعان ارقا سۇيەپ الادى.

«مەن شىڭعا شىققان سوڭ ماسكامدى شەشىپ، سۋرەتكە تۇسپەك بولعان ەدىم. بىردەن وتتەگى تاسىمالى توقتادى. ادام وتتەگىمەن دەمالعاندا جىلى اۋا كلاپانداعى ىلعالدىڭ قاتىپ قالۋىنا جول بەرمەيتىن. ماسكامدى قايتا كيگەندە كلاپانداعى سۋدىڭ ءبارى قاتىپ قالعانىن اڭعاردىم. دەم جەتپەي قالدى. باسقا ماسقا الىپ شىقپاعام. جاعدايىم مۇشكىل بولدى. ونداي كەزدە ەشكىمنىڭ ماسكاسىنا جارماسا المايسىڭ. ولار مۇزجارعىشىمەن سۇلاتىپ تۇسىرەدى. سەن ءۇشىن ەشكىم ءوز ءومىرىن قاتەرگە تىكپەيدى. 10-15 سوققىدان سوڭ ماسكاداعى مۇز سىنىپ كەتتى دە دەمالا باستادىم»، - دەدى ماقسۇت جۇمايەۆ.

الپينيستەر بۇل ساپاردا 8 مىڭ مەتر بيىكتىكتەگى شاتىردا ۇيىقتاۋعا ءماجبۇر بولعان.

سپورتشى ەۆەرەستكە قايتا شىعۋعا نە يتەرمەلەگەنىن ايتتى.

«بىرىنشىدەن، جاڭا مارشرۋتتى باعىندىرىپ كورمەك بولدىم. ەكىنشىدەن، اعزامنىڭ قابىلەتىن تاعى سىناعىم كەلدى. سونىمەن قاتار، كوماندا كاپيتانى، ەكسپەديتسيا باسشىسى رەتىندە ءوزىمدى كورگىم كەلدى. وسى جولى كوماندامىزدا 2 كاسىبي ەمەس الپينيست بولدى. ولاردى الىپ شىعۋ ۇلكەن جاۋاپكەرشىلىك. سونداي-اق، الەمنىڭ ەڭ بيىك شىڭىنا تاعى دا قازاقستاننىڭ تۋىن تىگىپ استانانىڭ 20 جىلدىعىنا سىيلىق جاساعىم كەلدى»، - دەدى ماقسۇت جۇمايەۆ.

الپينيستىڭ قاتەرگە تولى ەكسپەديتسياسى قازاقستاندىقتاردىڭ ماقتانىشىنا اينالدى.

كەزدەسكەن قيىندىقتارعا قاراماستان ەكسپەديتسيا ءساتتى اياقتالىپ، سپورتشىلار امان-ەسەن ورالدى.

ايتا كەتۋ كەرەك، ماقسۇت جۇمايەۆ ەۆەرەست شىڭىن 2007 -جىلى باعىندىرعان بولاتىن. الايدا، ول سولتۇستىكتەگى مارشرۋتپەن ءجۇرىپ وتكەن. وسى جولى سپورتشى شىڭعا ەڭ قيىن مارشرۋت - تاۋدىڭ وڭ قاپتالىمەن ءجۇرىپ وتىرىپ جەتتى.

بەلگىلى قازاق الپينيسى ماقسۇت جۇمايەۆ قازاقستان مەن قىرعىزستانداعى بارلىق شىڭداردى باعىندىردى. ت م د اۋماعىندا تابانى تيمەگەن تاۋ جوق. الەمدە بيىكتىگى 8000 مەتردەن اساتىن نەبارى 14 تاۋ بولسا، سونىڭ 14 ىنە دە شىققان. ماقسۇتتىڭ ەسىمى ايتۋلى بيىكتەرگە شىققان ەڭ جاس جانە ولاردى ەڭ قىسقا مەرزىمدە باعىندىرعان الپينيست رەتىندە گيننەستىڭ رەكوردتار كىتابىنا ەنۋى ءتيىس.