سينگاپۋر سىرتقى ىستەر ءمينيسترى ۆيۆيان بالاكريشنان سولتۇستىك كورەيا باسشىسىنىڭ ەلگە ساپارمەن كەلگەنىن راستاپ، سينگاپۋر اۋەجايىندا كيم چەن ىنمەن قول الىسىپ تۇرعان ءساتى بەينەلەنگەن فوتونى Twitter الەۋمەتتىك جەلىسىندە جاريالادى.
پرەزيدەنت ترامپ باستاعان ا ق ش دەلەگاتسياسى سينگاپۋرگە جەكسەنبى كۇنى كەشكە بارادى دەپ حابارلاندى. ونىمەن بىرگە ا ق ش مەملەكەتتىك حاتشىسى مايك پومپەو مەن ۇلتتىق قاۋىپسىزدىك ماسەلەلەرى بويىنشا كەڭەسشىسى دجون بولتون ىلەسىپ بارماق.
سينگاپۋرگە اتتانار الدىندا ترامپ الداعى كەزدەسۋدەن ءۇمىتتى ەكەنىن، ءبىراق، كيم چەن ىنمەن جۇزدەسكەن «العاشقى مينۋتتان- اق» سولتۇستىك كورەيا باسشىسىنىڭ كەلىسىم جاساۋعا دەگەن نيەتىن بىردەن اڭعاراتىنى تۋرالى مالىمدەگەن. ەگەر ونىڭ شىنايى نيەتى بايقالماسا، وندا كەلىسسوزگە «ۋاقىت شىعىندامايمىن» دەگەن ترامپ.
ا ق ش پەن كوممۋنيستىك بيلىك باسقارۋىنداعى سولتۇستىك كورەيا باسشىلارىنىڭ كەزدەسۋى - تاريحي وقيعا بولماق. بۇعان دەيىن ەكى ەلدىڭ باسشىلارى ەشقاشان كەزدەسپەگەن، ءتىپتى ءوزارا تەلەفونمەن دە سويلەسكەن ەمەس.
سينگاپۋردەگى كەزدەسۋدىڭ باستى تاقىرىبى - سولتۇستىك كورەيانىڭ يادرولىق باعدارلاماسىنا ارنالادى. ۆاشينگتون پحەنياندى يادرولىق قارۋدان ارىلۋعا كوندىرگىسى كەلەدى.
www.azattyq.org