قىتايمەن بىرلەسكەن جوبالارعا جۇمسالاتىن قاراجات مەملەكەتتىك قارىز ەمەس - نۇرسۇلتان نازاربايەۆ

چيڭداۋ. قازاقپارات - قىتايمەن بىرلەسكەن جوبالارعا جۇمسالاتىن قاراجات مەملەكەتتىك قارىز ەمەس.

بۇل تۋرالى قىتايعا مەملەكەتتىك ساپارىن قورىتىندىلاپ، قازاقستاندىق ب ا ق وكىلدەرىنە سۇحبات بەرگەن ق ر پرەزيدەنتى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.

«قىتاي بۇرىن ارزان تاۋارلاردى سىرتقا شىعاراتىن ەل سانالىپ كەلسە، ەندى قازىر ناعىز تەحنولوگيالىق بۇگىنگى زامانعا ساي، الدىڭعى قاتارلى عىلىمي تاۋارلاردى شىعارايىن دەپ وتىر. شىنىندا كەيىنگى 40 جىلدىڭ ىشىندەگى ءوسۋ، وركەندەۋ قارقىنى وتە ۇلكەن. قازىردىڭ وزىندە ا ق ش-تان كەيىنگى ەكىنشى ەكونوميكا بولىپ وتىر. تەك قانا ول ەمەس. ءىس جۇزىندە سيفرلاندىرۋ، كومپيۋتەرلەندىرۋ، جالپى قاي جاعىنان الىپ قاراساڭ دا الدىڭعى قاتارلى بولىپ كەلەدى. باتىسقا بىزدە جوق تەحنولوگيالاردى الۋعا باراتىنبىز. قازىر قىتاي تەحنولوگياسى باتىسپەن تارتىسقا تۇسكەندە كەم بولادى دەپ ايتا المايمىز»، - دەدى نۇرسۇلتان نازاربايەۆ.

مەملەكەت باسشىسى يندۋستريالاندىرۋ باعدارلامامىزدى ورىنداۋ ءۇشىن وعان قوندىرعىلار، ەكسپورتىق تاۋار شىعاراتىن زاۋىتتار سالۋىمىز كەرەكتىگىن ايتتى. وسى ماقساتتا قىتايمەن جالپى سوماسى 28 ميلليارد دوللاردى قۇرايتىن بىرلەسكەن 51 نىسان سالۋ كوزدەلگەن. ونىڭ 4 ەۋى ىسكە قوسىلدى، التاۋى بيىل پايدالانۋعا بەرىلەدى. 11 ى بويىنشا جۇمىس جاسالىپ جاتىر. كەلەسى جىلى تاعى 18 ى قولعا الىنادى.

«ايتپاقشى، جۋرناليستەر سەندەر بۇل نىسانداردىڭ قاي جەردە سالىنعان، نە ىستەپ جاتقانىن قاداعالاپ وتىرۋلارىڭىز كەرەك. ءبىر جاعىنان بۇل نىساندار كىشكەنتاي، ەكىنشى جاعىنان وتە ماڭىزدى. ماسەلەن، سەمەنت زاۋىتى نەمەسە قوستانايداعى اۆتوموبيل زاۋىتىن الايىق. ساپار اياسىندا الليۋر زاۋىتىنا قىتايلىق كاپيتال 49 پايىزبەن كىرىپ، 1,1 ميلليارد دوللار ينۆەستيسيا قۇيادى دەپ كەلىسىلدى. اۆتوموبيل ءوندىرىسى 100 مىڭ داناعا جەتەدى. وسىمەن بىتپەيدى. مەن بارلىق بولشەكتەر ەلىمىزدە شىعارىلۋى تيىستىگىن ايتتىم. دەمەك، مۇنىڭ بارلىعى دا ءبىزدىڭ كاسىپورىنداردا جاسالادى»، - دەدى مەملەكەت باسشىسى.

سونىمەن قاتار ەلباسى وسى جولعى مەملەكەتتىك ساپار اياسىندا ەكى ەلدىڭ ءىس ادامدارى اراسىندا 40 جوبانى جۇزەگە اسىرۋ تۋرالى كەلىسىمگە قول قويىلعانىن ايتتى.

«وسىنىڭ توڭىرەگىندە حالىققا ءتۇسىندىرىپ كەتەتىن ماسەلەلەر بار. بۇل جوبالاردىڭ بارلىعى دا مەملەكەت ەسەبىنەن جۇزەگە اسىرىلمايدى. بۇل مەملەكەتتىك قارىز ەمەس. بۇل كاسىپورىندار اراسىنداعى جۇمىس. ماسەلەن ENRC اليۋميني زاۋىتىن بىرلەسىپ سالىپ جاتىر. كومپانيا بۇل جوبا ءۇشىن جاۋاپ بەرىپ، اقشانى ءوزى تولەيدى. باياعىدان وسىلاي جۇمىس ىستەيمىز. سول سياقتى «قازاقمىس» ءونىمىن ەكسپورتقا شىعارىپ، تۇسكەن قاراجات ەسەبىنەن قارىزىن جابادى»، - دەپ ءتۇسىندىردى قازاقستان پرەزيدەنتى.