شاڭحاي ىنتىماقتاستىق ۇيىمىنا ءتوراعالىق قىرعىز رەسپۋبليكاسىنا وتەدى
شارانى اشقان ق ح ر ءتوراعاسى وتكەن جىلى ۇيىمعا تەڭ قۇقىلى مۇشە بولىپ قوسىلعان پاكىستان مەن ءۇندىستان باسشىلارىن العاش رەت وتىرىسقا قاتىسۋلارىمەن قۇتتىقتادى. سونىمەن قاتار ول بۇگىندە ش ى ۇ الەمدىك دەڭگەيدەگى مارتەبەلى ۇيىمعا اينالعانىن جانە بارلىق مەملەكەتتەر كۇش بىرىكتىرگەندە زور تابىسقا جەتەتىندىگىن باسا ايتتى.
«ش ى ۇ- عا ءتوراعالىق اياسىندا ءبىز جىل بويى مىندەتىمىزدى ابىرويمەن اتقارىپ، ساياسي، ەكونوميكالىق، گۋمانيتارلىق، قاۋىپسىزدىك، سىرتقى بايلانىستار جانە ينستيتۋتسيونالدى قامتاماسىز ەتۋ سالالارىندا 200 دەن استام ءتۇرلى شارالار ۇيىمداستاردىق. ش ى ۇ جۇمىسىندا ايتارلىقتاي ىلگەرىلەۋشىلىك بولدى. دەگەنمەن، بۇل ىلگەرىلەۋشىلىكتەردى سىزدەردىڭ قولداۋلارىڭىزسىز اتقارۋ مۇمكىن ەمەس. سوندىقتان سىزدەرگە ريزاشىلىعىمدى بىلدىرەمىن»، - دەپ اتاپ ءوتتى شي جينپيڭ.
قىتاي باسشىسىنىڭ ايتۋىنشا، ش ى ۇ- عا مۇشە مەملەكەتتەر تەرروريزم، سەپاراتيزم جانە ەكسترەميزمگە، ەسىرتكى ساۋداسىنا قارسى كۇش بىرىكتىرۋلەرى قاجەت. ءوزارا سەنىمدى ارتتىرىپ، تاتۋ كورشىلىك، دوستىق پەن ىنتىماقتاستىق ەرەجەلەرىن قاتاڭ ۇستانعان ءجون.
«اعىمداعى جىلى سىزدەردىڭ زور كومەكتەرىڭىزبەن، قولداۋلارىڭىزبەن ش ى ۇ-عا ءتوراعالىعىمىزدى اياقتاپ، سامميت وتكىزىپ جاتىرمىز. قىتاي تاراپى كونسترۋكتيۆتى جانە پراگماتيۆتى، دوستىق رۋحىندا وسى سامميتتە قول جەتكىزىلگەن ۋاعدالاستىقتى ۇيىمعا مۇشە مەملەكەتتەرمەن بىرگە جۇزەگە اسىرۋعا دايىن. الداعى ۋاقىتتا قىرعىز رەسپۋبليكاسىنىڭ ۇيىمعا ءتوراعالىعىنا قولداۋ كورسەتەتىن بولامىز»، - دەدى شي جينپيڭ.
ايتا كەتەيىك، وتىرىسقا قازاقستان پرەزيدەنتى نۇرسۇلتان نازاربايەۆ، رەسەي پرەزيدەنتى ۆلاديمير پۋتين، قىرعىز پرەزيدەنتى سوورونباي جەەنبەكوۆ، پاكىستان پرەزيدەنتى مامنۋن حۋسەين، تاجىكستان پرەزيدەنتى ەمومالي راحمون، وزبەكستان پرەزيدەنتى شاۆكات ميرزيەيەۆ، ءۇندىستان پرەمەر- ءمينيسترى نارەندرا مودي، ش ى ۇ- عى بايقاۋشى مارتەبەسى بار اۋعانستان پرەزيدەنتى اشراف عاني، بەلارۋس پرەزيدەنتى الەكساندر لۋكاشەنكو، يران پرەزيدەنتى حاسان روۋحاني جانە موڭعوليا پرەزيدەنتى حالتمااگيين باتتۋلا جانە ءبىرقاتار حالىقارالىق ۇيىمنىڭ باسشىلارى قاتىسۋدا.
كەڭەيتىلگەن قۇرامداعى وتىرىستان كەيىن ءسامميتتىڭ باستى قۇجاتى چيڭداۋ دەكلاراتسياسى قابىلدانىپ، 20 دان استام قۇجاتقا قول قويىلماق. ونىڭ 17 سىن مەملەكەت باسشىلارى راسىمدەيدى.
ەستە بولسا، وتكەن جىلى استانادا وتكەن سامميت بارىسىندا ش ى ۇ- عا مۇشە مەملەكەت باسشىلارى ءۇندىستان مەن پاكىستاندى ش ى ۇ-عا قابىلداۋ ۇدەرىسىن اياقتاۋ جانە مۇشە مارتەبەسىن بەرۋ تۋرالى تاريحي كەلىسىمگە قول قويعان بولاتىن. سودان كەيىنگى چيڭداۋ ءسامميتى سەگىزدىك فورماتىندا العاش رەت ءوتىپ جاتىر.