الەمدە بولىپ جاتقان جانجالدار ساياسي ديالوگ ارقىلى عانا شەشىلۋى ءتيىس - ق ر پرەزيدەنتى
بۇل تۋرالى بۇگىن قىتايدىڭ چيڭداۋ قالاسىندا شاڭحاي ىنتىماقتاستىق ۇيىمىنا مۇشە مەملەكەتتەر باسشىلارىنىڭ كەڭەيتىلگەن قۇرامداعى وتىرىسىندا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.
«ازيا، افريكا، تاياۋ شىعىس جانە وزگە دە «جانجال نۇكتەسىندەگى» قاقتىعىستاردى تەك ساياسي جولمەن عانا رەتتەۋ قاجەتتىگى تۋرالى مۇلتىكسىز ۇستانىمدامىز. قازاقستان اۋعانستاننىڭ ەكونوميكالىق تۇراقتىلىعى مەن قاۋىپسىز دامۋىنا مۇددەلى. بۇل تۇرعىدا كوپتەگەن جىلدار بويى كابۋلعا قارجىلاي جاردەم كورسەتىپ كەلەمىز. استانادا سيرياارالىق كەلىسسوزدەردى قابىلداۋشى تاراپ رەتىندە قازاقستان سيرياداعى پروتسەستەردىڭ رەتتەلۋىن ءجىتى قاداعالاپ وتىر. قىسقا عانا ۋاقىتتىڭ ىشىندە رەسەي، تۇركيا جانە يراننىڭ بەلسەندى قولداۋىمەن استانا كەلىسسوزدەر پروتسەسى ءوزىن سيرياداعى جالپىقامتىمدى بەيبىتشىلىككە قول جەتكىزۋ جولىنداعى ءتيىمدى قۇرال رەتىندە كورسەتە ءبىلدى»، - دەدى نۇرسۇلتان نازاربايەۆ.
ەلباسى قازاقستان كورەي تۇبەگىنىڭ يادروسىز ءوڭىر مارتەبەسىنە قول جەتكىزۋى تەك قانا بەيبىت جولمەن ءجۇرۋ تيىستىگىن جاقتايتىندىعىن باسا ايتتى. سونىمەن قاتار يراننىڭ يادرولىق باعدارلاماسى بويىنشا كەلىسىمگە كەلۋگە دە ەلىمىزدىڭ قوماقتى ۇلەس قوسقانىن اتاپ ءوتتى.
«سوندىقتان دا ءبىز ءىس- قيمىلدىڭ بىرلەسكەن جالپىقامتىمدى جوسپارىنىڭ ودان ارى مۇلتىكسىز ورىندالۋىنىڭ ساقتالۋىن تۇبەگەيلى ۇستانامىز»، - دەدى قازاقستان پرەزيدەنتى
سونىمەن قاتار مەملەكەت باسشىسى ەلىمىز ۇيىمنىڭ بارلىق مەملەكەتتەرىمەن سەنىمدى، دوستىق پەن تاتۋ كورشىلىكتى نىعايتۋعا ۇمتىلاتىنىن، شىۇ حارتياسى ۇستانىمدارىن نىق قولدايتىندىعىن باسا ايتتى.
ەلباسىنىڭ پايىمىنشا، وسى جىلداردىڭ ىشىندە شاڭحاي رۋحى ش ى ۇ- نىڭ ءتيىمدى قىزمەتىنىڭ بىرەگەي كوزىنە اينالىپ كەلدى.
«ق ح ر-دىڭ تابىستى ءتوراعالىعى بۇل ىرگەلى فاكتوردى ودان ارى نىعايتا ءتۇستى. ۇيىمىمىز بارلىق حالىقتارىمىز بەن مەملەكەتتەرىمىزدىڭ يگىلىگى ءۇشىن ودان ارى نىعايا تۇسەدى دەپ ءۇمىت ارتامىز. ءسوز سوڭىندا قىرعىزستانعا دا بولاشاقتاعى ءتوراعالىعى بارىسىندا وسىناۋ لاۋازىمدا ءدال وسىنداي جەمىستى جۇمىستار تىلەيمىن»، - دەدى ەلباسى.
مۇنان بولەك، وتىرىستا نۇرسۇلتان نازاربايەۆ ش ى ۇ-نىڭ ستراتەگيالىق باسىمدىعىن اتاپ، جاڭا تەحنولوگيالار بويىنشا تاجىريبە الماساتىن الاڭ قۇرۋدى ۇسىندى.
ايتا كەتەيىك، وتىرىسقا قازاقستان پرەزيدەنتى نۇرسۇلتان نازاربايەۆ، رەسەي پرەزيدەنتى ۆلاديمير پۋتين، قىرعىز پرەزيدەنتى سوورونباي جەەنبەكوۆ، پاكىستان پرەزيدەنتى مامنۋن حۋسەين، تاجىكستان پرەزيدەنتى ەمومالي راحمون، وزبەكستان پرەزيدەنتى شاۆكات ميرزيەيەۆ، ءۇندىستان پرەمەر- ءمينيسترى نارەندرا مودي، ش ى ۇ-عى بايقاۋشى مارتەبەسى بار اۋعانستان پرەزيدەنتى اشراف عاني، بەلارۋس پرەزيدەنتى الەكساندر لۋكاشەنكو، يران پرەزيدەنتى حاسان روۋحاني جانە موڭعوليا پرەزيدەنتى حالتمااگيين باتتۋلا جانە ءبىرقاتار حالىقارالىق ۇيىمنىڭ باسشىلارى قاتىسۋدا.
كەڭەيتىلگەن قۇرامداعى وتىرىستان كەيىن ءسامميتتىڭ باستى قۇجاتى چيڭداۋ دەكلاراتسياسى قابىلدانىپ، 20 دان استام قۇجاتقا قول قويىلماق. ونىڭ 17 سىن مەملەكەت باسشىلارى راسىمدەيدى.