قازاقستاننىڭ مۇناي- گاز سالاسىنىڭ دامۋىنا بار ءومىرىن ارناعان نۇرلان بالعىمبايەۆ اقتوبەدە باس ينجەنەر بولىپ جۇمىس ىستەدى. بۇگىن ءوزى جۇمىس ىستەگەن عيماراتقا ەسكەرتكىش تاقتا قويىلدى. مۇناي جانە گاز كەن ورىندارىن يگەرۋ جونىندەگى عىلىمي زەرتتەۋ ينستيتۋتى قابىرعاسىنداعى ەسكەرتكىشتى اشۋعا مارقۇم ن. بالعىمبايەۆتىڭ باۋىرى مەن وبلىس اكىمى بەردىبەك ساپاربايەۆ قاتىستى.
«جاقسىنىڭ جاقسىلىعىن ايت، نۇرى تاسىسىن» دەگەن ءسوز بار. ەل ءۇشىن، ۇلت ءۇشىن ەڭبەك ەتكەن ازاماتتاردى ەش ۋاقىتتا ۇمىتپاۋىمىز كەرەك. سولاردىڭ ءبىرى - نۇرلان وتەپ ۇلى. كەڭەس ۇكىمەتى كەزىندە مينيسترلىكتە جۇمىس ىستەگەن قازاقتان شىققان ازاماتتار از. نۇرلان وتەپ ۇلى ماسكەۋدە مۇناي- گاز سالاسىندا جۇمىس ىستەپ، شەتەلدە وقىپ، «شيەۆرون» كومپانياسىندا ەڭبەك ەتتى. ول قيىن كەزدە پرەمەر- مينيستر قىزمەتىن اتقاردى. حالىقتىڭ ءال- اۋقاتىن ارتتىرۋ ءۇشىن ۇلكەن ەڭبەك ەتتى»، - دەدى وبلىس اكىمى بەردىبەك ساپاربايەۆ.
ءوڭىر باسشىسى ءوز سوزىندە نۇرلان بالعىمبايەۆقا كوشە بەرۋ ۋاقىت ەنشىسىندەگى ءىس ەكەنىن اتاپ ءوتتى. سەبەبى، جەكە ادامعا كوشە اتاۋىن تەك قايتىس بولعان سوڭ 5 جىل وتكەندە عانا بەرىلەدى.
ايتا كەتەيىك، نۇرلان بالعىمبايەۆ مۇنايشىلار وتباسىندا دۇنيەگە كەلىپ، ديناستيانى جالعاستىردى. ول مۇناي جانە گاز ءمينيسترى، پرەمەر- مينيستر قىزمەتىن اتقارىپ، 1 - دارەجەلى «بارىس» وردەنىنىڭ يەگەرى اتاندى. ەسكەرتكىشتىڭ اشىلۋى كەزىندە ءىنىسى نۇربەرگەن بالعىمبايەۆ اعاسىن ەسكە الدى.
«اتامىز بالعىمباي 1911 -جىلى دوسسورداعى مۇناي كومپانياسىندا اعاش شەبەرى بولىپ جۇمىس ىستەدى. بالعىمبايدان تاراعان 5 بالا مۇنايشى، ودان تاراعان 25 بالا دا مۇناي- گاز سالاسىندا ەڭبەك ەتىپ ءجۇر. ال اقتوبە وبلىسى نۇرلان ءۇشىن ۇلكەن باستاماعا سەرپىن بەرگەن ءوڭىر. باس ينجەنەر بولىپ جۇمىس ىستەپ، ماسكەۋدە مۇناي جانە گاز مينيسترلىگىنە كەتتى. اقتوبەدە مۇناي وڭدەۋ زاۋىتى، جاڭاجولدا ۇڭعىمالار ىسكە قوسىلىپ جاتقان كەزدە ەڭبەك ەتتى. قازىرگى كەزدە 400-500 ۇڭعىما بولسا، ول كەزدە 20-عا جۋىق ۇڭعىما ىسكە قوسىلدى. اپتالاپ، ونداعان كۇن زاۋىت باسىندا بولىپ، اياز بەن ىستىققا قاراماي ەڭبەك ەتتى»، - دەدى نۇربەرگەن بالعىمبايەۆ.