رەسەيدە جىل باسىنان بەرى جانارماي باعاسى ۇزدىكسىز ءوسىپ كەلەدى، ءتىپتى مامىر ايىندا ونىڭ قۇنى بىردەن 6 پايىزعا قىمباتتاعان. سوڭعى اپتانىڭ وزىندە بەنزين پارقى ءبىر جارىم پايىزعا وسكەن. بۇل كولىك جۇرگىزۋشىلەردىڭ قالتاسىن قاعىپ وتىر.
كولىك جۇرگىزۋشىسى:
- سوڭعى كەزدە قاتتى اسەر ەتىپ وتىر. بۇل باعانىڭ قايدا كەتىپ بارا جاتقانىن بىلمەيمىن. بەنزين تىم قىمبات، سارانسكىگە كولىكپەن بارىپ قايتتىم، ودان ۇشاقپەن بارعانىم ارزان بولار ەدى.
ەكونوميستەر جاعدايدىڭ بۇلاي ۋشىعۋىنا بىرنەشە سەبەپ بار دەپ وتىر.
ياروسلاۆ ليسوۆوليك، ەۋرازيالىق دامۋ بانكىنىڭ باس ەكونوميسى:
- رەسەي وندىرۋشىلەرىنىڭ تۇرعىسىنان قاراساق، بەنزين باعاسىنا اسەر ەتكەن نەگىزگى فاكتورلاردىڭ ءبىرى الەمدىك نارىقتاعى مۇناي باعاسىنىڭ ءوسۋى بولىپ وتىر. بۇدان بولەك وعان رۋبلدىڭ قۇنسىزدانۋى مەن سالىق تا اسەر ەتۋدە. باسەكە دامىماعاندىقتان، باعانى ءىرى كومپانيالار بەلگىلەپ وتىر.
باعانى تۇراقتاندىرۋ ءۇشىن رەسەي ۇكىمەتى بەنزين مەن ديزەلگە دەگەن اكسيزدى تومەندەتتى. وسىنداي شارا 2015 -جىلدان بەرى العاش رەت قابىلدانىپ وتىر. جانارماي باعاسىنىڭ كۇرت ءوسۋى ينفلياتسيانىڭ ارتۋىنا اكەلۋى مۇمكىن.
ۆالەريي ۆويتكو، «الىسقا قاتىنايتىن جۇرگىزۋشىلەر» قوزعالىسىنىڭ ۇيلەستىرۋشىسى:
- ءبىز ۇن، ماكارون، قانت سەكىلدى كۇندەلىكتى ازىق- تۇلىك تۋرالى ايتقاندا، ونىڭ تاسىمالداۋ شىعىنىنداعى جانارماي باعاسىنىڭ ۇلەسى قازىردىڭ وزىندە 42-44 پايىزعا جەتىپ وتىر. سايكەسىنشە وسى شىعىننىڭ بارلىعى ازىق- تۇلىك باعاسىنا كىرەدى. ءبىر- ءبىر جارىم ايدان سوڭ حالىق تۇتىناتىن ونىمدەر باعاسىنىڭ ايتارلىقتاي وسكەنىن سەزەمىز. جانارماي قۇنى وسسە، ءبارى قىمباتتايتىنى انىق.
«جانارماي باعاسىنىڭ شارىقتاۋىنا اسەر ەتكەن فاكتورلار قازىر وزەكتى ەمەس»، - دەيدى رەسەي ورتالىق بانكى. ۆاليۋتا باعامى مەن الەمدىك نارىقتاعى مۇناي باعاسىنىڭ ءبىرشاما تۇراقتاپ، ۇكىمەت تاراپىنان سالىق جۇكتەمەسىنىڭ ازايۋى دا بۇعان دالەل بولىپ وتىر. وسىنى ەسەپكە الا وتىرىپ، ەكونوميستەر بەنزين پارقىنىڭ ءوسۋى ەندى توقتايدى دەپ وتىر.
www.24.kz