بيدايدان كيىم جاساۋ تەحنولوگياسى: ءىرى ينۆەستور قازاقستانعا كەلۋدى قالايدى

 استانا. قازاقپارات - «اتامەكەن» ۇ ك پ باسشىسى ابىلاي مىرزاحمەتوۆ بيداي وڭدەۋدىڭ تىڭ تەحنولوگياسى تۋرالى ايتىپ بەردى.

بۇگىندە اتالعان تەحنولوگيانىڭ پاتەنتىن ءىرى شەتەلدىك ينۆەستور ۇستاپ وتىر، دەپ حابارلايدى قازاقپارات ءتىلشىسى.

«مەملەكەت باسشىسىنىڭ قىتايعا جاسايتىن ساپارى بارىسىندا بىرنەشە ءىرى ينۆەستورمەن كەلىسسوزدەر جۇرگىزىلەدى. بۇل - قىتايلىق كومپانيالار ەمەس، سول جاقتا جۇمىس ىستەپ جاتقان الەمدىك كومپانيالار. ولار بيوتەحنولوگيالار بويىنشا حالىقارالىق پاتەنتتەردى ۇستاپ وتىر. بىزدە بيداي كوپ قوي. جاڭاعى كومپانيالار بيداي وڭدەۋدىڭ «جەتىنشى ساتىسىن» ىسكە اسىرۋعا دايار. بيداي وڭدەۋدىڭ «ەكىنشى- ءۇشىنشى ساتىسى» ول - ۇن جانە ۇن ونىمدەرى بولسا، بەسىنشى جانە التىنشى ساتىدا كراحمال مەن گليۋتەن وندىرىلەدى. ودان قانت، سيروپ جانە تاعى باسقا ونىمدەردى جاسايدى. ال «جەتىنشى ساتى» - بۇل جاڭا پاتەنت. بارلىعى ونى ءوز ەلىنە اكەلۋگە تالپىنىپ ءجۇر. ول پاتەنتتىڭ يەسى - امەريكالىق كاسىپكەر. ءوزى گونگكونگتا تۇرادى. پاتەنتتىڭ نەگىزىندە بيدايدان ارنايى سينتەتيكا جاساۋعا بولادى. بۇل دايىن ماتا عوي. ودان كيىم تىگۋگە مۇمكىندىك بار» ، - دەدى ا. مىرزاحمەتوۆ قازاقپارات تىلشىسىنە بەرگەن سۇحباتىندا.

پالاتا باسشىسىنىڭ ايتۋىنشا، اتالعان كومپانيالاردىڭ جەتەكشىلەرى مەملەكەت باسشىسى نۇرسۇلتان نازاربايەۆپەن كەزدەسىپ، ءوز جوبالارىن تانىستىرۋعا مۇددەلى.

«پرەزيدەنت ول باستامالاردى قولداسا، 2-3 ميلليارد دوللاردى تارتۋعا مۇمكىندىك بار. ال بيدايدان سينتەتيكالىق ماتەريال جاساساق، سونىڭ ءبىراز بولىگىن قىتايعا ساتۋعا ابدەن بولادى. نەگىزى، ينۆەستوردىڭ ءوزى دە قازاقستانعا كەلۋدى قالاپ وتىر. بۇعان دەيىن ءبىز وعان بيدايىمىزدىڭ ساپاسىن، ءوندىرىس ورىندارىن، ءبارىن- ءبارىن كورسەتتىك. وعان ۇنادى» ، - دەپ اتاپ كورسەتتى ا. مىرزاحمەتوۆ.