ەلباسى ءبىرقاتار ەكىجاقتى كەزدەسۋلەر وتكىزدى

استانا. قازاقپارات - قازاقستان پرەزيدەنتى نۇرسۇلتان نازاربايەۆ ەۋروپا قايتا قۇرۋ جانە دامۋ بانكىنىڭ پرەزيدەنتى سۋما چاكرابارتيمەن كەزدەستى، دەپ حابارلايدى اقوردانىڭ باسپا ءسوز قىزمەتى.

كەزدەسۋ شەتەلدىك ينۆەستورلار كەڭەسىنىڭ 31-پلەنارلىق وتىرىسى باستالار الدىندا ءوتتى. كەلىسسوز بارىسىندا تاراپتار ينۆەستيتسيالىق ىنتىماقتاستىق جانە بىرلەسكەن جوبالاردى جۇزەگە اسىرۋدىڭ پەرسپەكتيۆالارى جونىندەگى ماسەلەلەردى تالقىلادى.

مەملەكەت باسشىسى شەتەلدىك ينۆەستورلار كەڭەسىنىڭ جۇمىسىنا قاتىسقانى ءۇشىن سۋما چاكرابارتيگە ريزاشىلىق ءبىلدىرىپ، وسىنداي ەكى جاقتى كەزدەسۋدىڭ ءداستۇرلى سيپات العانىن ايتتى.

قازاقستان پرەزيدەنتى قازىرگى ۋاقىتتا ەلىمىزدە بىرلەسكەن ينفراقۇرىلىمدىق جوبالاردىڭ جۇزەگە اسىرىلىپ جاتقانىن اتاپ ءوتتى.

«وسى جىلدار ىشىندە قازاقستانعا 7 ميلليارد دوللاردان استام ينۆەستيتسيا تارتىلدى. قازىر سىزدەر قازاقستانمەن ىنتىماقتاستىقتىڭ ەلارالىق باعدارلاماسىن قابىلدادىڭىزدار. ءىرى ينفراقۇرىلىمدىق باعدارلامالار ىسكە اسىرىلۋدا. شاعىن جانە ورتا بيزنەستىڭ دامۋىنا جول اشىپ، اگرارلىق كەشەندى قولداۋ ءىسى وزەكتى بولىپ قالا بەرەدى» ، - دەدى نۇرسۇلتان نازاربايەۆ.

 

 س. چاكرابارتي قازاقستاندا ينۆەستيتسيالىق بەلسەندىلىكتى ىنتالاندىرۋ ۇدەرىسىندەگى شەتەلدىك ينۆەستورلار كەڭەسى باسقوسۋلارىنىڭ تيىمدىلىگى مەن ماڭىزدىلىعى جانە مەملەكەت پەن بيزنەس اراسىنداعى سىندارلى ديالوگتىڭ دامۋى جونىندە ايتتى.

سونداي- اق، ەلباسى «Royal Dutch Shell» كونسەرنىنىڭ باس اتقارۋشى ديرەكتورى بەن ۆان بەردەنمەن كەزدەستى.

كەزدەسۋ شەتەلدىك ينۆەستورلار كەڭەسىنىڭ پلەنارلىق وتىرىسى اياقتالعاننان كەيىن ءوتتى.

كەلىسسوز بارىسىندا تاراپتار ءوزارا ىنتىماقتاستىقتى كەڭەيتۋ جانە ستراتەگيالىق ارىپتەستىكتى دامىتۋ جونىندەگى وزەكتى ماسەلەلەردى تالقىلادى.