قارجى مينيسترلىگى مەملەكەتتىك قارىز نە سەبەپتى وسكەنىن ءتۇسىندىردى

استانا. قازاقپارات - سەناتتىڭ قارجى جانە بيۋدجەت كوميتەتىنىڭ كەڭەيتىلگەن وتىرىسىندا ق ر قارجى ۆيتسە-ءمينيسترى بەرىك شولپانقۇلوۆ قازاقستاننىڭ مەملەكەتتىك قارىزى نە سەبەپتى ءوسىپ جاتقانىن ءتۇسىندىردى، دەپ حايۋبارلايدى قازاقپارات.

«مەملەكەتتىك قارىز جانە كۆازيمەملەكەتتىك سەكتوردىڭ سىرتقى قارىزى بويىنشا كوپ تالقىلاۋلار بولدى. شىنىمەن دە، بۇل باعىتتا ءوسىم بار. قارىزدىڭ قۇرىلىمىندا نەگىزگى ۇلەس ۇكىمەتتىك بورىشقا تيەسىلى. ونىڭ كولەمى جىل سايىن قارىز الۋ ەسەبىنەن رەسپۋبليكالىق بيۋدجەت تاپشىلىعىن قارجىلاندىرۋ سوماسىنا ارتىپ وتىر»، - دەپ ءتۇسىندىردى ب. شولپانقۇلوۆ.

ونىڭ اتاپ وتۋىنشە، ورتا مەرزىمدى جوسپاردا قارجى مينيسترلىگى رەسپۋبليكالىق بيۋدجەتتىڭ تاپشىلىعىن الداعى جىلدارى تۇراقتى تۇردە تومەندەتۋدى كوزدەپ وتىر.

«اعىمداعى جىلى رەسپۋبليكالىق بيۋدجەت تاپشىلىعى كولەمى ج ءى ءو-گە شاققاندا 1,5 پايىزدى قۇرادى، ال 2017 -جىلى بۇل كورسەتكىش 2,6 پايىزدى قامتىدى. ياعني بۇل باعىتتا تومەندەۋ ءۇردىسى بايقالىپ وتىر. الداعى ۋاقىتتا ۆاليۋتالىق تاۋەكەلدەردەن تاۋەلدىلىككە جول بەرمەس ءۇشىن قارىز الۋ كاپيتالدىڭ ىشكى نارىقتارىنا نەگىزدەلەدى»، - دەدى ۆيتسە- مينيستر.

بۇدان بولەك ب. شولپانقۇلوۆ كۆازيمەملەكەتتىك سەكتوردىڭ سىرتقى قارىزى دا باقىلاۋعا الىنعانىن جەتكىزدى. وسى ورايدا بيىلدان باستاپ مونيتورينگتى قارجى ءمينيسترى جۇزەگە اسىرادى.