پاريج تۇرعىندارى اتىراۋلىقتاردىڭ ونەرىنە تامسانىپ، تاڭداي قاقتى

 اتىراۋ. قازاقپارات - دينا نۇرپەيىسوۆا اتىنداعى اتىراۋ وبلىستىق قازاق حالىق اسپاپتار وركەسترى پاريجدە ونەر كورسەتتى، دەپ حابارلايدى قازاقپارات ءتىلشىسى.

كونسەرت فرانتسياداعى قازاقستان ەلشىلىگىنىڭ قولداۋىمەن «رۋحاني جاڭعىرۋ» باعدارلاماسى اياسىندا ۇيىمداستىرىلعان. ۇلى دالا مۋزىكاسىن تىڭداۋعا بەس جۇزدەن اسا ادام جينالدى.

فرانسياداعى قازاقستان ەلشىسى جان گاليەۆتىڭ ايتۋىنشا، ەلباسى نۇرسۇلتان نازاربايەۆتىڭ «رۋحاني جاڭعىرۋ» باعدارلاماسى اياسىندا ءوتىپ جاتقان اتىراۋلىق ارتىستەردىڭ گاسترولدىك ساپارى قازاقستان مەن فرانسيا اراسىنداعى مادەني بايلانىستى نىعايتا تۇسەدى. پاريجدەگى كورەرمەن قاۋىم قۇرمانعازى، دينا، ىقىلاس، تۇركەش، نۇرعيسا تىلەنديەۆ، لاتيف حاميدي، ەۆگەني برۋسيلوۆسكي سىندى دارىنداردىڭ شىعارمالارىنا تامسانىپ، تىك تۇرىپ قوشەمەت كورسەتتى.

 «ۇلتتىق اسپاپتار وركەسترىنىڭ كونسەرتى 28 - مامىر كۇنى پاريجدەگى گاۆودا كلاسسيكالىق كونسەرت زالىندا ءوتتى. 53 ءارتىسى بار وركەستر شەتەلدىك تىڭدارمانعا «شۋاقتى ولكەنىڭ شاتتىعى» باعدارلاماسىن ۇسىندى. وندا دينا مەن قۇرمانعازىنىڭ تۋىندىلارى شىرقالدى. ودان بولەك، اكادەميالىق وركەستردىڭ رەپەرتۋارىندا يۋبەر يۆ ادريان جيرونىڭ «پاريج اسپانىنىڭ استىندا» ، جورج بيزەنىڭ «سميت سەرەناداسى» ، نۇرعيسا تىلەنديەۆتىڭ «كەل ەركەم- الاتاۋىڭا» ، «پەرتسكايا كراساۆيتسا» جانە تاعى دا باسقا دا تۋىندىلارىن كورسەتتى» ، - دەيدى اتىراۋ وبلىسى مادەنيەت، مۇراعاتتار جانە قۇجاتتاما باسقارماسىنىڭ وكىلدەرى.

«ءبىزدىڭ گاسترولدىك ساپاردىڭ ماقساتى - شەتەلدىك اۋديتوريانى قازاقتىڭ حالىقتىق مۋزىكاسىمەن، سالت- داستۇرىمەن، مادەنيەتىمەن تانىستىرۋ. پاريج قالاسىنا كەلىپ، شەتەلدىك تۇرعىندارعا وسىنداي كەرەمەت قازاقتىڭ ونەرىن، مادەنيەتى مەن كۇيىن كورسەتكەنىمىزگە قۋانىشتىمىز. بۇگىن تەك كۇيلەر عانا ەمەس، الەمدىك كلاسسيكالىق شىعارمالاردى دا ورىندادىق، حالىق وتە جاقسى قابىلدادى. قازاقتىڭ كۇيى شەت مەملەكەتتەردىڭ تورىندە شارىقتاي بەرسىن» ، دەدى - د. نۇرپەيىسوۆا اتىنداعى وركەستردىڭ باس ديريجەرى ارمان جۇدەبايەۆ.

وسىلايشا پاريج حالقى قازاق ونەرىنىڭ قۇدىرەتى مەن ۇلتتىق اسپاپتاردىڭ شەكسىز مۇمكىندىگىنە جانە وركەستردىڭ باس ديريجەرى ارمان جۇدەبايەۆتىڭ شەبەرلىگىنە ءتانتى بولدى.

ايتا كەتكەن ءجون، وركەستر ساپارلارىندا قازاقستانداعى فرانتسيا ەلشىلىگىنىڭ شاقىرتۋىمەن اتتانعان. كونسەرت قازاقستان مەن فرانتسيا اراسىنداعى ستراتەگيالىق ىنتىماقتاستىقتىڭ 10  جىل تولۋى اياسىندا وتكىزىلدى.