ديماش قۇدايبەرگەن قازاقستان تۋريزمىنىڭ ەلشىسى اتاندى
اقتوبەدە «باقىتتى بالا» بايقاۋى ۇيىمداستىرىلىپ، ءانشى ديماش قۇدايبەرگەن ارنايى كەلدى. ءانشى ارنايى ءوزى ءۇشىن كەلگەن فانتوپ جەتەكشىلەرىمەن كەزدەستى. كەزدەسۋ كەزىندە «قازاق تۋريزم» ۇ ك» ا ق باسقارما ءتوراعاسى راشيد كۇزەمبايەۆ ديماش قۇدايبەرگەنگە قازاقستان ءتۋريزمىنىڭ ەلشىسى سەرتيفيكاتىن تابىس ەتتى.
«قازاقستاندا العاش رەت فانتوپتار ءۇشىن تۋريستىك مارشرۋت ۇيىمداستىرىلدى. ءانشى ءوز كونسەرتتەرىندە جانكۇيەرلەرىن ۇنەمى وتانىنا شاقىرىپ وتىرادى. مارشرۋت دا ارنايى تاڭدالدى. ديماش الماتى، استانا، اقتوبە قالالارىن ءجيى ايتىپ وتىرادى. سوندىقتان «اتامەكەن» ۇ ك پ، اقتوبە وبلىسىنىڭ اكىمدىگى، «سكات» اۋە كومپانياسى مەن ءۇش قالانىڭ تۋروپەراتورى قولدادى. ءبىزدىڭ ويىمىزشا بۇل تۋردىڭ بولاشاعى زور. سەبەبى، ديماشتىڭ اتى كۇن سايىن شارىقتاپ كەلەدى ءارى فانتوپتار دا كوبەيۋدە. وسى جولمەن ءبىز «ديماش» برەندىن دامىتا الامىز»، - دەدى راشيد كۇزەمبايەۆ.
«قازاق تۋريزم» ۇ ك» ا ق-ى ديماش قۇدايبەرگەننىڭ قىتاي مەن شىعىس ازياداعى سۇرانىسى مەن تانىمالدىلىعى ارقىلى قازاقستاندى تانىتۋدى ماقسات ەتىپ وتىر.
«ءبىر جارىم اي بۇرىن فۋتبولشى مەسسي الەمدىك تۋريزم ۇيىمىنىڭ ەلشىسى اتاندى. ءبىز دە ءبىز ديماش قۇدايبەرگەنگە قازاقستان تۋريزمىنىڭ ەلشىسى سەرتيفيكاتىن ۇسىنامىز. ول ءوز ەلىنىڭ پاتريوتى»، - دەدى راشيت كۇزەمبايەۆ.
ايتا كەتەيىك، اقتوبەگە الەمنىڭ 10 ەلىنەن فانتوپ باسشىلارى كەلدى. سونىمەن قاتار، قازاقستانداعى ەكى فانتوپ اقتوبەدە باسقوستى. ولار ديماش قۇدايبەرگەنمەن كەزدەسىپ، ول ءبىلىم العان مەكتەپكە، كوللەدجگە بارادى.
«استانا قالاسىن ارالاپ، ديماش قۇدايبەرگەن ءبىلىم العان ونەر اكادەمياسىنا بارادى. سونىمەن قاتار، فانتوپتار ءوزارا كەزدەسەدى. ال الماتىدا مەدەۋ، شىمبۇلاقتى ارالاپ، مۋزەيگە بارادى. امىرە قاشاۋبايەۆ، دينا نۇرپەيىسوۆا، الىبەك دىنىشەۆتىڭ شىعارمالارىمەن تانىسادى. بۇل العاشقى تۋر. ارتىقشىلىقتارىمىز بەن كەمشىلىكتەردى ءبىلىپ، دامىتامىز. بارلىعى 7 كۇنگە جوسپارلانعان»، - دەدى راشيت كۇزەمبايەۆ.
قازاقستاندا ءبىرىنشى رەت جەكە ادامعا تۋريستىك مارشرۋت جاسالىپ وتىر. بۇل تۋر تانىستىرۋ رەتىندە ۇيىمداستىرىلدى. ال كەلەسىدە فاناتتار تۋرتوپتامانى ءوز قارجىسىنا ساتىپ الادى.
«بۇل جولى كاسىپكەرلەر دەمەۋشى بولدى. ءبىراق ەندى ءبارى تۋروپەراتورلارمەن رەتتەلەدى. بۇل ساپاردا قىتايلىق 20 فانات كەلۋگە ءوتىنىش بىلدىرگەن. ءبىراق ونى ءبىز كەيىنگە شەگەردىك»، - دەدى ر. كۇزەمبايەۆ.