پاريج تۇرعىندارى دينا نۇرپەيىسوۆا اتىنداعى وركەستردىڭ ونەرىن تاماشالادى
كونسەرت فرانسياداعى قازاقستان ەلشىلىگىنىڭ قولداۋىمەن «رۋحاني جاڭعىرۋ» باعدارلاماسى اياسىندا ۇيىمداستىرىلعان. ۇلى دالا مۋزىكاسىن تىڭداۋعا بەس جۇزدەن اسا ادام جينالدى.
فرانسياداعى قازاقستان ەلشىسى جان گاليەۆتىڭ ايتۋىنشا، «رۋحاني جاڭعىرۋ» باعدارلاماسى اياسىندا ءوتىپ جاتقان اتىراۋلىق ارتىستەردىڭ گاسترولدىك ساپارى قازاقستان مەن فرانسيا اراسىنداعى مادەني بايلانىستى نىعايتا تۇسەدى. پاريجدەگى كورەرمەن قاۋىم قۇرمانعازى، دينا، ىقىلاس، تۇركەش، نۇرعيسا تىلەنديەۆ، لاتيف حاميدي، ەۆگەني برۋسيلوۆسكي سىندى دارىنداردىڭ شىعارمالارىنا تامسانىپ، تىك تۇرىپ قوشەمەت كورسەتتى.
ارمان جۇدەبايەۆ، د. نۇرپەيىسوۆا اتىنداعى وركەستردىڭ باس ديريجەرى:
- پاريجگە كەلىپ، وسىنداي كەرەمەت قازاقتىڭ كۇيىن دۇبىرلەتكەنىمىزگە قۋانىشتىمىز! بۇگىن تەك كۇيلەر عانا ەمەس، الەمدىك كلاسسيكالىق شىعارمالاردى دا ورىندادىق، حالىق وتە جاقسى قابىلدادى. قازاقتىڭ كۇيى شەت مەملەكەتتەردىڭ تورىندە شارىقتاي بەرسىن.
البەر فيشلەر، پاريج ۋنيۆەرسيتەتىنىڭ پروفەسسورى:
- بۇل كەش ماعان ءلاززات سىيلادى. ءبىز قۇرمانعازىنىڭ كۇيلەرىن سۇيسىنە تىڭدادىق. ديريجەردىڭ ارقاسىندا ۇلى دالانىڭ بار سۇلۋلىعىن سەزىنتە بىلگەن وركەستر كەرەمەت! ارتىستەر كونە اسپاپ قوبىز بەن دومبىرانىڭ جوعارى قۇدىرەتتى ەكەنىن كورسەتە ءبىلدى. ال وركەستر باتىس كلاسسيكاسىنىڭ ايگىلى كومپوزيتورلارى يوگانن شتراۋس، جورج بيزە مەن يۋبەر جيرونىڭ شىعارمالارىن ورىنداعاندا، كورەرمەندەر تاڭدانىستارىن جاسىرا المادى.
دانيەل ۋربان، پاريج قالاسىنىڭ تۇرعىنى:
- ماعان ءبارى ۇنادى. شىنىمدى ايتسام، تەك حالىق مۋزىكاسىن تىڭدايتىن شىعارمىن دەپ ويلاعانمىن، الايدا كونسەرت مەن ويلاعاننان دا اسىپ ءتۇستى: بۇل سيمفونيالىق فولكلور بولدى. مەن 18-19 - عاسىردىڭ كلاسسيكالىق مۋزىكاسىن ۇناتامىن، ءبىراق بۇگىن ورتالىق ازيانىڭ سيمفونيالىق كومپوزيتسياسى مەن ىرعاقتارىن تىڭداۋ وتە اسەرلى بولدى.
تابارەك دوگۋ، پاريجدەگى قازاق دياسپورىسىنىڭ وكىلى:
- ەۋروپانىڭ تورىندە، پاريجدە قازاقتىڭ ءان- كۇي كونسەرتى ءوتىپ جاتىر، ءبىز وتە قۋانىشتامىز، كەرەمەت! ەندى ءبىزدىڭ تىلەگىمىز شەتەلدە جۇرگەن دياسپورالارعا، قازاقتارعا ءجيى كەلىپ تۇرسىنشى، ۇمىتپاۋ ءۇشىن. اسىرەسە جاستار ءۇشىن كەرەك.
ەلباسىمىزدىڭ «رۋحاني جاڭعىرۋ: بولاشاققا باعدار» باعدارلاماسىندا دا وسىنى ايتتى. قۇلاقتارىنا سىڭە بەرسىن دەيمىز. وسىلايشا پاريج حالقى قازاق ونەرىنىڭ قۇدىرەتى مەن ۇلتتىق اسپاپتاردىڭ شەكسىز مۇمكىندىگىنە جانە وركەستردىڭ باس ديريجەرى ارمان جۇدەبايەۆتىڭ شەبەرلىگىنە ءتانتى بولدى.
www.24.kz