ساۋد ارابياسى ا ق ش پرەزيدەنتىنىڭ ايەلى تۇرعان ءۇيدى اسا قىمبات باعاعا ساتىپ الدى

استانا. قازاقپارات - ۆيردجينيا شتاتىنىڭ سولتۇستىگىندە ا ق ش-تىڭ 35-پرەزيدەنتى دجون كەننەديدىڭ ايەلى جاكلين كەننەدي تۇرعان جەكەجاي ساۋد ارابياسىنىڭ ۇكىمەتىنە 43 ميلليون دوللارعا ساتىلدى.

بۇل تۋرالى سارسەنبىدە Wall Street Journal گازەتى جازدى.

اتالعان نىسان امەريكا استاناسى ايماعى جانە ونىڭ ماڭىنداعى قالالار تاريحىنداعى ەڭ قىمبات تۇرعىن عيماراتقا اينالىپ وتىر.

ساۋد ارابياسى وكىلىنىڭ ايتۋىنشا، «مەرريۆۋد» جەكەجايى ا ق ش-قا كەلگەن رەسمي دەلەگاتسيالاردىڭ ورنالاسۋى ءۇشىن قاجەت.

بۇعان دەيىن جەكەجاي America Online كومپانياسىنىڭ نەگىزىن قالاۋشىلاردىڭ ءبىرى ستيۆ كەيسكە تيەسىلى ەدى. ول ءۇيدى 2005 -جىلى 24,5 ميلليون دوللارعا ساتىپ الىپ، بىلتىر 49,5 ميلليون دوللارعا ساتاتىنىن مالىمدەگەن.

جەكەجاي پوتوماك وزەنىنىڭ جاعاسىندا ورنالاسقان، جالپى اۋماعى 2,3 گەكتاردى الىپ جاتىر. ساۋلەتتى ءۇيدىڭ جالپى اۋدانى - 2,137 مىڭ شارشى مەتر. وندا تەننيس كورتى، باسسەين، سپورتزال، ءتورت اۆتوموبيل سياتىن گاراج، ت. ب. بار.

 

فوتو: wsj.com