فۋتبولدان قازاقستان ايەلدەر قۇراماسىنا جاڭا باس باپكەر تاعايىندالدى

استانا. قازاقپارات - فۋتبولدان قازاقستان ايەلدەر قۇراماسىنىڭ باس باپكەرى بولىپ ءرازيا نۇركەنوۆا تاعايىندالدى، دەپ حابارلايدى قازاقپارات ءتىلشىسى.

«ءبىز بۇگىن فۋتبولدان قازاقستان ايەلدەر قۇراماسىنىڭ باس باپكەرىن تاعايىنداپ جاتىرمىز. مەن ءرازيا تولەۋ قىزى تۋرالى قىسقاشا ايتىپ وتسەم دەيمىن. ول قاراعاندى وبلىسىنىڭ تۋماسى. 23 جاسىندا رەسەيگە كەتكەن، 26  جىلدان بەرى سول جاقتا تۇرادى. كەزىندە كەڭەس وداعىنىڭ فۋتبولدان ايەلدەر قۇراماسىندا ويناعان. سول كەزدە قاراعاندىداعى ايەلدەر كومانداسىنىڭ نامىسىن قورعاعان. بۇگىنگى تاڭدا ول سامارداعى بالالار كومانداسىن جاتتىقتىرىپ ءجۇر. بۇعان دەيىن فۋتبولدان ايەلدەر قۇراماسى باس باپكەرىنىڭ كومەكشىسى بولىپ ەڭبەك ەتكەن. شىنىمىزدى ايتساق، ءبىزدىڭ فەدەراتسيا باسشىلىعى ءبىزدىڭ ۇسىنىستى قابىلداعانىنا قۋانىشتى»، - دەدى استانادا وتكەن باسپا ءسوز ءماسليحاتىندا باس باپكەردى تانىستىرعان قازاقستان فۋتبول فەدەراتسياسىنىڭ باس حاتشىسى ازامات ايتقوجين.

ءرازيا نۇركەنوۆا قاراعاندى قالاسىنىڭ پەداگوگيكالىق ينستيتۋتىندا ءبىلىم العان. 1992 -جىلدان باستاپ سامارا قالاسىنىڭ ЦСК ВВС  كومانداسىندا ويناعان. 2001 -جىلى فۋتبولدى تاستاپ، 2003 -جىلدان سامارادا سپورت مەكتەبىندە باپكەرلىك قىزمەتىن باستادى. 2009 -جىلدان ايەلدەر فۋتبولىنان ЦСК ВВС  كاسىبي كومانداسىنىڭ باس باپكەرى اتاندى. ال 2007 -جىلدان باستاپ رەسەي قىزدار قۇراماسىنىڭ اعا جاتتىقتىرۋشىسىنىڭ كومەكشىسى. فۋتبولدان ءبىرىنشى دارەجەدەگى تورەشى.

 ءرازيا نۇركەنوۆا رەسەيدىڭ ءۇش دۇركىن چەمپيونى (1993، 1994، 1996)، رەسەي چەمپيوناتىنىڭ ءتورت دۇركىن كۇمىس جۇلدەگەرى (1992، 1995، 1997، 1998)، رەسەي چەمپيوناتىنىڭ ەكى دۇركىن قولا جۇلدەگەرى(1999، 2000)، رەسەي كۋبوگىنىڭ يەگەرى (1994) بولعان.

اۆتور: ايان بەكەن ۇلى